ज्येष्ठ नागारिक दिवसमा १ सय ३ वर्षे बृद्धा अभिननिदत

चौतारा । चौतारा वृद्धाश्रम सेवा समितिले चौतारा साँगाचोकगढी नगरपालिका– १४ कि १ सय ३ वर्षे बृद्धा ईन्द्रकुमारी बस्नेतलाई अभिनन्दन गरिएको छ ।

३२औं अन्तराष्ट्रिय ज्येष्ठ नागारिक दिवसको अवसरमा आयोजित १४औं साधारण सभा तथा छैठौं अधिवेशनको अवसरमा नगरपालिकाकै जेष्ठ नागरिक बस्नेतलाई अभिनन्दन गरेको हो । जिल्ला समन्वय समिति सिनधुपाल्चोकका प्रमुख बालकृष्ण श्रेष्ठले उनलाई सम्मान गरेका थिए । श्रेष्ठले सो कार्यक्रमलाई सम्बोधन गर्दै बृद्धबृद्धा देशको गहना भएका कारण उनीहरुलाई सम्मान गर्नु आवश्यक रहेको बताए ।

कार्यक्रममा चौतारा साँगाचोकगढी नगरपालिका उपप्रमुख सीता थापाले आफ्नो जीवनकालमा संगालेका ज्ञान, सीप र अनुभवनयाँ पुस्ताको लागि मार्गदर्शन हुने भएकाले सरकारले उनीहरुको संरक्षणमा चासो राख्नुपर्नेमा जोड दिईन् । सो अवसरमा बृद्धाश्रमलाई सहयोग गर्ने विभिन्न व्यक्तित्व र संस्थालाई कदरपत्र प्रदान गरिएको थियो ।

कार्यक्रममा प्रमुख जिल्ला अधिकारी वेदनिधि खनाल, प्रहरी उपरीक्षक रामेश्वरप्रसाद यादव, प्रमुख सेनानी जनक सिलवाल, अनुसन्धान प्रमुख कुमार खड्का, पुर्व सांसद कृष्णराज श्रेष्ठ, पूर्व जिसस उपप्रमुख बालकुमारी सापकोटा, समाजसेवी डा. विनोद दंगाल, डा. अर्चना केसीलगायतले शुभकामना दिएका थिए ।

१४औं साधारण सभा एवम् छैठो अधिवेशनले ९ सदस्यीय कार्य समिति सर्वसहमतिमा चयन गरेको छ । जसमा ५ जना पदाधीकारी नयाँ चयन भएका छन् । कार्यक्रममा अन्जना सापकोटाले आफ्नो जन्मदिन मनाउँदै सम्पुर्ण व्यक्तित्वहरुलाई खिर र तरकारी समेत खुवाएकी थिईन् ।