विजयी उम्मेदवारलाई प्रमाणपत्र वितरण

चौतारा । सिन्धुपाल्चोकमा विजयी उम्मेदवारलाई प्रमाणपत्र वितरण गरिएको छ । मंसिर ४ गते सम्पन्न प्रतिनिधि र प्रदेशसभा निर्वाचनमा निर्वाचित सांसद्हरुलाई आईतबार मूख्य निर्वाचन अधिकृतको कार्यालयले प्रमाणपत्रसहित सम्मान गरेको हो ।

प्रतिनिधिसभा क्षेत्र नं. १ बाट प्रतिनिधि सभा सदस्यमा विजयी भएका माधव सापकोटा, सोहि क्षेत्रको प्रदेश सभा १ मा विजयी मसिना खड्का, प्रदेशसभा २ मा विजयी सरल सहयात्री पौडेललाई निर्वाचन अधिकृत रुद्रप्रसाद सुवेदीले अविर टिका र खाँदा लगाई प्रमाणपत्रले सम्मान गरे । त्यस्तै क्षेत्र नं. २ बाट प्रतिनिधि सभा सदस्यमा निर्वाचित मोहनबहादुर बस्नेत, सोहि क्षेत्रको प्रदेश सभा १ मा विजयी युवराज दुलाल र प्रदेश सभा २ मा विजयी कृष्णकुमार तामाङलाई मूख्य निर्वाचन अधिकृत विदुर कोईरालाले प्रमाणपत्रसहित सम्मान गरेका थिए ।

कार्यक्रममा उपस्थित कर्मचारी, सुरक्षा निकाय, स्थानीय तहका जनप्रतिनिधि र राजनीतिक दलको प्रतिनिधि लगायतले नवनिर्वाचित जनप्रतिनिधिहरुलाई बधाई ज्ञापन गर्दै खाँदा लगाएर सम्मान गरेका थिए । सिन्धुपाल्चोककाबाट प्रतिनिधि र प्रदेशसभामा निर्वाचित ६ जना विजयी उम्मेदवार बाम लोकतान्त्रीक गठबन्धनक उम्मेद्वार हुन् । नेकपा (माओवादी केन्द्र) लाई एक प्रतिनिधि सभासहित २ प्रदेशसभा र नेपाली कांग्रेसलाई पनि एक प्रतिनिधिसभासहित २ प्रदेशसभा भागबण्डा गरिएको थियो ।

विजयी उम्मेद्वारको तर्फबाट बोल्दै प्रतिनिधिसभा १ का विजयी उम्मेदवार माधव सापकोटाले जिल्लाको समृद्धि र विकासका लागि तीनै तह हातेमालो गरेर काम गर्न प्रतिवद्धता व्यक्त गरे । चाँडो भन्दा चाँडो तातोपानी नाका सञ्चालन गर्नको लागि आफूले उच्चस्तरीय राजनैतिक संयन्त्रलाई भेट गरी प्रयत्न सुरु गर्ने बताए ।

कार्यक्रममा मूख्य निर्वाचन अधिकृत विदुर कोईरालाले सबैको सामुहिक प्रयासले मंसिर ४ गतेको प्रतिनिधि र प्रदेशसभा निर्वाचन निष्पक्ष, स्वतन्त्र, भयरहित र पारदर्शी ढंगले सम्पन्न गर्न सहयोग पुगेको बताए । ‘निर्वाचन सफल बनायौं, यसका लागि कर्मचारी, सुरक्षा, राजनीतिक दल र आम सरोकारवालाहरुको महत्वपूर्ण भूमिका रह्यो,’ मुख्य निर्वाचन अधिकारी कोईरालाले भने,‘ अहोरात्र खटाई र जिम्मेवार प्रस्तुतीकरणका कारण निर्वाचन सम्पन्न गर्न सफल भयौं, यसका लागि सबै पक्षलाई हार्दिक धन्यवादसहित आभार व्यक्त गर्दछु ।’

सिन्धुपाल्चोकको कुल मतदाता २ लाख ६० हजार २ सय ७३ मतदाता रहेकोमा ५६ दशमलव २१ प्रतिशत मात्रै मत खसेको थियो । प्रतिनिधि सभा क्षेत्र नं. १ मा गठबन्धनका साझा उम्मेदवार माओवादीका सापकोटाले निकटतम् प्रतिद्वन्दी एमालेका सरेश नेपाललाई ३ हजार ३ सय ५४ मतान्तरले पराजित गरे । सापकोटाले ३० हजार ३ सय ७४ मत ल्याए भने नेपालले २७ हजार २० मत मात्र पाए ।

त्यस्तै प्रदेशसभा १ मा कांग्रेसकी खड्काले एमालेका बुद्धविक्रम तामाङलाई पराजित गरिन् । खड्काले तामाङ १ हजार ६२ मतान्तरले हराइन् । खड्काले १४ हजार ६ सय ५२ मत पाउँदा तामाङले १३ हजार ४ सय ९० मत ल्याए । प्रदेश सभा २ मा माओवादीका पौडेल एमाले उम्मेदवार होमनारायण श्रेष्ठलाई ४ हजार २ सय ४३ मतान्तरले पराजित गर्न सफल भए । पौडेलले १७ हजार २ सय ५६ मत ल्याउँदा श्रेष्ठले १३ हजार १३ मत मात्र पाए ।

प्रतिनिधि सभा क्षेत्र नं. २ मा कांग्रेस उम्मेदवार बस्नेतले एमालेका शेरबहादुर तामाङलाई ११ हजार ८ सय ७४ मतान्तरले पराजित गरे । बस्नेतले ३९ हजार ३ सय ६७ मत ल्याए भने तामाङले २७ हजार ४ सय ९३ मत मात्र पाए । प्रदेशसभा १ तर्फ माओवादीका दुलालले एमाले उम्मेदवार अमानसिं तामाङलाई पराजित गरे । दुलालले २० हजार २ सय ६ मत ल्याए भने तामाङले १२ हजार १ सय ३९ मत मात्र पाए । प्रदेशसभा २ मा एमालेका उम्मेदवार हस्तबहादुर पण्डितलाई पराजित गर्दै कांग्रेसका तामाङ निर्वाचित भएका हुन् । तामाङले १७ हजार सय ५८ मत ल्याए भने पण्डितले १६ हजार २ सय ५३ मत मात्र पाएका थिए ।