गजलसंग्रह ‘आकाश मेरो पनि’ को लोकार्पण

काठमाण्डौ । लामो समयदेखी साहित्य कर्ममा सक्रिय सिक्किमेली स्रष्टा जीविका अश्रुको गजलसंग्रह ‘आकाश मेरो पनि’ को लोकार्पण गरिएको छ ।

राष्ट्रिय जनसाहित्यिक संघ नेपालको आयोजनामा भएको कार्यक्रममा संग्रहको लोकार्पण गर्दै प्रमुख अतिथि जनसांस्कृतिक महासंघ नेपालका अध्यक्ष प्रेमनाथ अधिकारीले जीविकाको साहित्यिक चेत संगीतमय रहेको बताए । ‘जातीय विभेद हटाएर एकताबद्ध भएर रहने चेत भएका गजल यस संग्रहभित्र पाएको छु,’ उनले भने ।

सो कार्यक्रममा विशिष्ट अतिथि वरिष्ठ साहित्यकार स्नेह सायमीले साहित्यको सीमाना हुँदैन भन्दै नेपालकी चेली जीविका अश्रु सिक्किममा रहेर भाषा साहित्यको सेवामा अनवरत लागिरहेकोमा गर्व लागेको सुनाउँदै लेखनकार्यमा अनवरत ललागिरहन उत्साहित गरे ।

अर्का विशिष्ट अतिथि देउडा गायक नन्दकृष्ण जोशीले आफूले कान्तिपुर रेडियो कार्यक्रममा वाचन गर्ने गरेका गजलको स्मरण गर्दै पुस्तकाकारमा आएको कृति ‘आकाश मेरो पनि’ विमोचनको कार्यक्रम काठमाडौमा भएको हुँदा यसले स्रष्टाहरुलाई एकै मालामा गाँसेको विचार व्यक्त गरे ।

कार्यक्रममा डा. देवी नेपालले समिक्षकको भूमिका निर्वाह गरेका थिए । उनको संग्रहभित्रका गजलले जुनसुकै चुनौतीको सामना गर्नपनि सामथ्र्य रहेको बताए । उनले गजलतर्फ बढेका पाइला अब नमोढ्न पनि आग्रह गर्दै शुभकामना ब्यक्त गरे ।

लोकार्पण कार्यक्रमको सञ्चालन ज्ञानु बिद्रोहीले गरेका थिए भने कार्यक्रमको संयोजन भने दिपेन्द्र बनेपालीले गरेका थिए । साहित्यकार राम विनय सभाध्यक्षमा लोकार्पण कार्यक्रम गरिएको थियो ।