१० पत्रकारलाई सम्मान र पुरस्कार प्रदान

चौतारा । नेपाल पत्रकार महासंघ सिन्धुपाल्चोकको २८औँ साधारण सभाको अवसरमा पत्रकारिता क्षेत्रमा विशेष योगदान पुर्याए वापत १० जना पत्रकारलाई आईतबार सम्मान र पुरस्कृत गरिएको छ ।

सिन्धु पत्रकारिता सेवा सम्मानबाट माधव नेपाल र स्व. इश्वरीमान–राम स्मृति पत्रकारिता सम्मानबाट विष्णु न्यौपाने र रामकुमार केसीलाई सम्मान गरिएको छ । त्यस्तै कार्यक्रममा कञ्चन–ज्ञानेन्द्र स्मृति पत्रकारिता पुरस्कारबाट डम्बर रसिक भारती, स्व. पवित्रा घिमिरे रेडियो पत्रकारिता पुरस्कारबाट टीका दाहाल, स्व. दुर्गाप्रसाद श्रेष्ठ स्मृति पत्रकारिता पुरस्कारबाट कला अनुरागी, स्व. नानीराम नेपाल स्मृति पत्रकारिता पुरस्कारबाट दुर्गा दुलाल, सर्वपक्ष पत्रकारिता पुरस्कारबाट सुन्दर शिरीष, रामप्रसाद घिमिरे स्मृति पत्रकारिता पुरस्कारबाट विमल नेपाल र जुगल नवोदित पत्रकारिता पुरस्कारबाट कमला पाख्रिन पुरस्कृत भएका हुन् । पुरस्कृतहरुलाई नगद ५ हजार ५ सय ५५ रुपैंयासहित सम्मापत्र प्रदान गरिएको थियो ।

सोहि अवसरमा सिन्धुपाल्चोक उद्योग वाणिज्य संघका अध्यक्ष होमबहादुर बस्नेत राजकुमार, ब्ल्याक हर्स इन्टरप्राईजेजका सञ्चालक बेदबहादुर श्रेष्ठ, इन्जिनियर गम्भीरलाल श्रेष्ठ, सुकुटे बीच रिसोर्टका सञ्चालक महेन्द्र थापा, सुकुटे भ्याली रिसोर्टका सञ्चालक नारायण श्रेष्ठ, समाजसेवी नकुल नेपाल र जुगल बोर्डिङ स्कुलका प्रिन्सिपल ओमप्रकाश उप्रेतीलाई समेत सम्मान गरिएको थियो ।

साधारण सभालाई सम्बोधन गर्दै प्रेस काउन्सिल नेपालका अध्यक्ष बालकृष्ण बस्नेतले पत्रकारहरुले स्वच्छ पत्रकारिता गर्नुपर्नेमा जोड दिए । बस्नेतले पूर्वाग्राही रुपमा नभई पत्रकारले सत्य तथ्यको जगमा टेकेर मात्रै पत्रकारिता गर्दा पत्रकारजस्तो उँचो पेशाको मर्यदा रहने बताए । ‘पत्रकार सदैव जनताको आवाज बन्नुपर्दछ’, उनले भने– ‘पत्रकारलाई सहि मार्गमा डोहोर्याउन पत्रकार महासंघको भूमिका महत्वपूर्ण हुन्छ ।’

पत्रकारिता क्षेत्रमा पनि विकृति भित्रिएको भन्दै उनले स्वतन्त्र, स्वस्थ, स्वच्छ पत्रकार बन्नुपर्नेमा प्रेरित गरे । अध्यक्ष बस्नेतले साना लगानीका सञ्चारमाध्यमलाई राज्यले थप सेवा सुविधा दिनुपर्ने औल्याउँदै अबको पत्रकारले अनलाइन, युट्युब जस्ता नयाँ मिडियालाई अधिकतम उपयोग गरी जनताको पक्षमा सूचना प्रवाह गर्नतर्फ ध्यान केन्द्रीत हुनुपर्ने बताए ।

साधारण सभामा नेपाल पत्रकार महासंघका केन्द्रिय सचिव गोविन्द चौलागाई, सुनकोशी गाउँपालिकाका अध्यक्ष टपेन्द्र तिमल्सिना, प्रमुख जिल्ला अधिकारी वेदनिधी खनाल, बागमती प्रदेश अध्यक्ष शिव देवकोटा, प्रदेश महासचिव कृष्ण सारु मगर, सिन्धुपाल्चोक उद्योग वाणिज्य संघका अध्यक्ष होमबहादुर बस्नेत राजकुमार, नेकपा (एमाले) का जिल्ला अध्यक्ष कमल नेपाल, नेकपा (माओवादी केन्द्र) का जिल्ला संयोजक गोविन्द पराजुली लगायतले सभाको सफलताको शुभकामना व्यक्त गरेका थिए ।

साधारण सभाको बन्दसत्रमा प्रस्तुत प्रगति प्रतिवेदन र आर्थिक प्रतिवेदनलाई पारित गरेको छ । कार्यक्रम जिल्ला शाखाका अध्यक्ष जीवन श्रेष्ठको अध्यक्षतामा सम्पन्न भएको हो ।