सिन्धु पुत्री डोल्मालाई मिस मंगोल– २०२२ को उपाधि

काठमाण्डौ । सिन्धुपाल्चोकको भोटेकोशी गाउँपालिका– ५ की पासाङ डोल्मा शेर्पाले रिडी ग्रुप मिस मंगोल नेपाल– २०२२ को उपाधि हात पारेकी छन् ।

काठमाडौंमा आयोजित यो प्रतियोगिताको ग्राण्ड फिनालेमा उत्कृष्ट प्रस्तुति दिँदै पासाङले यो उपाधि जितेकी हुन् । पासाङले मिस ट्यालेन्टको उपाधि समेत जितिन् । जमलस्थित राष्ट्रिय नाचघरको प्रेक्षालयमा आयोजित ग्राण्ड फिनालेमा धनगढीकी दीपिका थापा मगरले फस्ट रनर्स अप तथा सोलुखुम्बुकी डोल्मा छिरिङ शेर्पाले सेकेण्ड रनर्स अपको उपाधि जितिन् । डोल्माले मिस नुप्लास्टको उपाधि समेत जितिन ।

उपाधि जित्दै शेर्पाले ५० हजार नगद पुरस्कार प्राप्त गरेकी छिन् । यस्तै मिस ट्यालेन्ट उपाधि पनि शेर्पाले नै जितेकी छिन् । माईक्रो वायोलोजिमा व्याचुलर पास गरेकी २४ बर्षिया शेर्पा अहिले गाउँकै विद्यालयमा अध्यापन गराउदै आएकी छिन् । शेर्पाले उक्त उपाधि जितेपछि गाउँपालिकाले उनलाई बधाई ज्ञापन गरेको छ । उपाधि विजेता शेर्पाले अब गाउँपालिकाभित्रै महिला तथा बालबालिकाको क्षेत्रमा काम गर्ने रुची देखाएको र उनको उक्त कार्यमा गाउँपालिकाले पुर्ण रुपमा सहयोग र समर्थन गर्ने भोटेकोशी गाउँपालिकाकी उपाध्यक्ष दिछेन शेर्पाले बताईन् ।

प्रतियोगितामा पर्साकी आसेन्ला घलेले मिस मंगोल मधेश, काठमाडौंकी प्रार्थना शाहीले मिस मंगोल बागमती, पोखराकी प्रिसिल्ला गुरुङले मिस मंगोल गण्डकी, दाङकी मुना बुढामगरले मिस मंगोल लुम्बिनी तथा धनगढीकी दीपिका थापा मगरले मिस मंगोल सुदुरपश्चिमको उपाधि जित्न सफल भए । संस्कृति र प्रतिभाको सम्मानको रुपमा यो प्रतियोगिता सन् २००९ देखि निरन्तर आयोजना हुँदै आएको छ । मिस मंगोल नेपाल रूपमा सौन्दर्य प्रतियोगिता भए पनि सारमा एउटा सांस्कृतिक अभियान भएको आयोजक संस्थाले जनाएको छ ।

नयाँपुस्तामा निहित प्रतिभा प्रस्फुटन, व्यक्तित्व विकास, नेतृत्वदायी भूमिका निर्वाह, नारी सशक्तीकरण, सांस्कृतिक संरक्षण एवं जागरण तथा सामाजिक सद्भाव कायम गर्ने उद्देश्यका साथ यो प्रतियोगिता आयोजना हुँदै आएको छ । एक्सन इन्टरटेनमेन्टले आयोजना गर्दै आएको यस प्रतियोगितामार्फत देशभरका सयौं प्रतिभावान युवतीले आफ्नो वृत्ति विकास गर्दै आएका छन् ।