नेतृत्वले जमरकट्टेललाई सर्वसम्मत गराउन दबाब दिएपछि बैठक छोडेर हिँडे सांसद सहयात्री

काठमाण्डौ । माओवादी बागमती प्रदेश सभाको संसदीय दलको नेता छनौटमा सकस देखिएको छ ।

पुस १५ नटुंगिएपछि आज पेरिसडाँडामा जारी दलका नेता छान्ने बैठकमा नेताहरुले चुनावको सट्टा सर्वसम्मत गर्ने नाममा जबरजस्ती गर्न खोजपछि प्रदेश सभा सदस्य एवं माओवादीका बागमती पार्टी अध्यक्ष सरल सहयात्री बैठक छोडेर हिँडेका छन् । पेरिसडाँडाबाट बाहिरिएपछि उनले फेसबुकमा स्टाटस लेख्दै छिर्के लगाएर लडाउने खेलको संज्ञा दिँदै आफू धुलो टक्टक्याउँदै कुदिरहने बताएका छन् ।

उनले भनेका छन्– ‘गेम जितिने स्वस्थ प्रतिस्पर्धाले हो । छिर्के लगाएरपनि गेम त जितिन्छ तर मन जितिदैन । जब सम्म मन जितिदैन केहीपनि जितिदैन । म हरेकपटक छिर्के लगाएर लडाइएपनि धुलो टक्टक्याउदै कुदिरहेको धावक हुँ ।’

यसअघि बागमती प्रदेशको नेतृत्व चयनमा पनि सहयात्रीले चुनावी मैदानबाटै जित निकालेका थिए । सिन्धुपाल्चोक १ को प्रदेशसभा २ बाट विजयी उनी युवा पुस्ताका उम्दा नेता हुन् । बागमती संसदीय दलको नेताका लागि शालिकराम जमरकट्टेल, युवराज दुलाल र सरल सहयात्री पौडेलले इच्छा देखाएका छन् ।

माओवादीको भागमा पर्ने सम्भावना रहेको यो प्रदेशमा संसदीय दलको नेताले मुख्यमन्त्री बन्ने सम्भावनाकै कारण प्रतिस्पर्धा तिब्र छ ।