३० परिवारको निःशुल्क जीवन बिमा

बराम्ची । सिन्धुपाल्चोकको जुगल गाउँपालिकाले जनआन्दोलनका सहिद परिवार, घाइते परिवार, अति विपन्न तथा विपन्न ३० परिवारको जीवन बिमा गरिदिएको छ ।

विहीबार एक कार्यक्रमबीच रिलायवल नेपाल लाईफ इन्स्योरेन्सद्वारा जारी बिमालेख सम्वन्धित बिमितहरुलाई गाउँपालिका अध्यक्ष रेशम स्याङ्बोले हस्तान्तरण गरे । पालिकाले छुट्टयाइएको ५ लाख रकमबाट १० वर्षे आवधिक जीवन बिमा गरेको हो । यो पहिलो बर्षको १० वर्षसम्म पालिकाले ५÷५ लाख किस्ता बन्दीमा बिमाशुल्क भुक्तानी गर्नेछ । पहिलो चरणको कार्यक्रम भएकाले आगामी वर्षहरुमा पनि आवश्यकता पहिचान गरि यसलाई निरन्तरता दिईने अध्यक्ष स्याङ्बोले जनाए । अब जनप्रतिनिधि र कर्मचारीको पनि छिटै बिमा गर्ने उनको भनाई थियो ।

यस्तै उनले बलेफी हाईड्रोपावर समेत भएको पालिका भए पनि स्थानीयले लाभ लिन नसकेको बताउँदै हाईड्रोमा चाहिने जनशक्ति बाहिरबाट नल्याई स्थानीयलाई नै परिचालन गर्ने योजना रहेको बताए । जनता खुसी भए भने मात्रै विकास भएको अनुभुति हुने स्याङ्बोको भनाइ थियो । सोही अवसरमार इन्स्योरेन्सका क्षेत्रीय प्रवन्धक राजकुमार गिरीले बिमाको विषयमा जानकारी गराएका थिए ।