दिगो विकासको अवधारणा ल्याएका छौंः मन्त्री दुलाल

चौतारा । बागमती प्रदेशको भौतिक पूर्वाधार विकास मन्त्री युवराज दुलालले जनताले दिएको करको सही सदुपयोग नभईरहेको पाईएकोले दिगो विकासको अवधारणा ल्याएको बताएका छन् ।

चौतारा साँगाचोकगढी नगरपालिका– ७ सानोसिरुवारीमा रहेको सिद्धिगणेश माध्यमिक विद्यालयको ६१औं वार्षिकोत्सव, अभिभावक भेला तथा भूपू विद्यार्थी पुनर्मिलन कार्यक्रमलाई सम्बोधन गर्दै मन्त्री दुलालले जनताको गाँस काटेर उठाईएको करबाट गरिने प्रत्येक विकास माटो र पानीमा मिसिएकोजस्तो भएको भन्दै सडक, सार्वजनिक भवन लगाएत पूर्वाधारहरूमा गरिएको लगानी खेर जान नदिन आफूले दिगो विकासको अवधारणा ल्याएको बताए ।

आफू भौतिक विकासमन्त्री भएसँगै सबै सडकहरूको स्तर उन्नती तत्काल गर्ने उद्घोष गर्दै दुलालले विकासको कार्यमा कुनै सम्झौता नगर्ने प्रतिबद्धता जनाए । मिहिनेतपूर्वक लागियो भने सफलतापूर्वक परिणाम आउँदो रहेछ भन्ने कुरा सिद्धिगणेश लगाएत विद्यालयले प्राप्त गरेको भन्दै आफू सामाजिक विकास मन्त्री हुँदा बागमती प्रदेशका २० वटा विद्यालय छनौट गरेको स्मरण गरे ।

मन्त्री दुलालले आफूले ल्याएको विद्यालय नर्स कार्यक्रम, विद्यालय बस कार्यक्रम प्रभावकारी रहेको दावी गरे । त्यस्तै बागमती प्रदेश सरकारले अब २ सय नर्स थप्ने योजना रहेको उनको भनाई छ । पछिल्लोपटक विद्यालयका वार्षिक कार्यक्रम सुधारात्मक हुँदै गएको बताउँदै मन्त्री दुलालले अझ सिर्जनात्मक बनाउन आग्रह गरे । यस अघि बागमती भित्र ५ सय नर्स कायम भईसकेका छन् ।

कार्यक्रममा एसियाली विकास बैंक परामर्श दाता डा. रामप्रसाद घिमिरेले विज्ञान र प्रविधिको बदलिदो अवस्थामा विद्यालयका बालबालिकाहरूलाई प्रविधिमैत्री बनाउनु पर्ने धारणाा राखे । विद्यालयको वार्षिक उत्सव कार्यक्रमलाई विभित्र व्यक्तित्वहरूले शुभकामना मनतब्य राखेका थिए ।

वार्षिकोत्सवको अवसरमा सो विद्यालयमा अध्यायन गरेर उच्च ओहदा तथा सरकारको विभिन्न निकायहरूमा पुग्न सफल व्यक्तित्वहरूलाई सम्मान गरिएको थियो । सम्मानित हुनेहरूमा सोही विद्यालयका पूर्व विद्यार्थी बागमती प्रदेशका भौतिक पूर्वाधार विकास मन्त्री युवराज दुलाल, उर्जा तथा एशियाली विकास बैंक परामर्श दाता डा. रामप्रसाद धिताल, शसस्त्र प्रहरी बल प्रहरी नायब उपरीक्षक श्यामबाबु घिमिरे र चार्टर एकाउन्ट राजेश नेपाल लगाएत थिए ।

विद्यार्थीहरूको विज्ञान प्रयोगशाला प्रदर्शन तथा साँस्कृतिक प्रस्तुती सहितको वार्षिकोत्सब कार्यक्रममा विद्यालयका प्रध्यानध्यापक राजकुमार यादवले विद्यालयको वार्षिक प्रतिवेदन प्रस्तुत गरेका थिए । प्रतिवेदन प्रस्तुत गर्दै यादवले विद्यालयको औषत सिकाई उपलब्धिमा बृद्धि भईरहेको बताए ।