संर्घष अझैं बाँकी छः उपप्रमुख थापा

चौतारा । चौतारा साँगाचोकगढी नगरपालिकाकी उपप्रमुख सीता थापाले महिलाको अधिकार स्थापित गर्नको लागि संघर्ष अझैं बाँकी रहेको बताईन् ।

नगरपालिकाको ६ नं. वडा महिला सञ्जालले आयोजना गरेको महिला हिंसा न्यूनिकरण विषायक दुई दिने अन्र्तरक्रिया कार्यक्रममा शुक्रबार थापाले संविधानदे महिलालाई अधिकार दिएपनि त्यस्ता अधिकारलाई समाजमा स्थापति गराउन संघर्ष गरिरहनु परेको बताईन् । समाजको हरेक वर्गमा पितृसत्तात्मक सोच नहटिसकेका कारण पनि संघर्ष गरिरहनु परेको बताईन् ।

अहिले हिंसाको स्वरुप फेरिएको बताउँदै उपप्रमुख थापाले महिलाले कुनै प्रकारको हिंसा सहन नहुने बताईन् । ‘समाजमा हुने कुनै पनि घटना भयो भने न्यायिक समितिमा आउनुस्, न्यायिक समितिले तपाईलाई न्याय दिनेछ’, उनले भनिन्– ‘हिंसा सहनु भनेको हिंसालाई प्रशय दिनु हो ।’ आफू आफ्नो खुट्टामा उभिदा हरेक प्रकारको हिंसा कम हुने उनले बताईन् ।

‘छोरीलाई दुई पाटा जग्गा पास गरेर दिने कोही छ ?’, उनले भनिन्– ‘चेतनास्तर माथि नउठुन्जेल विभेद् जारी नै रहन्छ, छोरालाई अंश दिनेले छोरीलाई दिन अझैं अन्कनाईरहेका छन् ।’ पहिला छोरा छोरीमा शिक्षामा विभेद् हुन्थ्यो तर अहिले छोरो विदेशमा पढाईन्छ भने छोरोलाई काठमाण्डौमा पढाईन्छ त्यो पनि विभेद् रहेको उनले बताईन् ।

कार्यक्रममा सामुदायिक प्रहरीले पनि हिंसा न्यूनिकरण सम्बन्धी प्रशिक्षण दिएको थियो । सो कार्यक्रमको सहजिकरण प्रशिक्षक रामशरण विकले गरेका छन् । दुईदिनसम्म चल्ने अन्र्तरक्रियामा नगर महिला सञ्जालको उपाध्यक्ष रिना श्रेष्ठ, वडा सदस्य मनकुमारी चुवान, लिला नेपाली लगायतका जनप्रतिनिधिहरु र वडाभरका अगुवा महिलाहरुको उपस्थिति थियो ।