जुगलको पाचँ हिमाल आरोहण खुलाउन नेपाल सरकारलाई सिफारिस

काठमाण्डौ । सिन्धुपाल्चोकको जुगल हिमशृङ्खला अन्तरगतको ५ वटा हिमाल पर्वतारोहण खुला गर्नका लागि नेपाल सरकारलाई अनुरोध गर्दै सिफारिस गरिने भएको छ ।

जिल्लाको दोर्जे लाक्पा र जुगल हिमनदी बिचमा रहेका चार र जुगल हिमनदी र जुगल याङ्री हिमचुलीको बीचमा रहेको एक हिमचुली गरी जम्मा पाचँ हिमचुलीको नामकरण गरी आरोहणका लागी खुला गर्न सस्ंकृति पर्यटन तथा नागरीक उड्ययन मन्त्रालय मार्फत नेपाल सरकारमा सिफारिस गर्ने निर्णय गरिएको जुगल गाउँपालिका अध्यक्ष रेशम स्याङबोले जानकारी दिए ।

आईतबार पर्यटन विभागको सभाहलमा अन्तरक्रिया कार्यक्रम गरी नापी विभागले एभरेष्ट १८ सय ३० कोर्डिनेट सिस्टमबाट निर्धारण गरेको कोर्डिनेट अनुसार हिमचुलीको नामकरण गरी आरोहणका लागि खुला गर्न सिफारिस गर्ने निर्णय भएको अध्यक्ष स्याङबोको भनाई छ । उनका अनुसार ५ हजार ९ सय २२ देखि ६ हजार ५ सय ९१ मिटरसम्मका हिमालमा पर्वतारोहणको लागि खुला गर्न सिफारिस गरिने बताए । हिमाल आरोहण खुला गरी विदेशी पर्यटक आगमन बढाउने योजनाअनुसार कुनकुन हिमालमा पर्वतारोहीको आकर्षण देखिन सक्छ भनि छलफल गरेर यो निर्णय गरिएको अध्यक्ष स्याङबोको भनाई छ ।

सिफारिस गरिएको नाममा जुगल १ को उचाई ६ हजार पाचँ सय ९१ मिटर, यहाँ ८५ डिग्री ४५ मिनेट ११.४९ सेकेण्ड पुर्वी देशान्तर रहेको छ भने अक्षाँश २८ डिग्री १० मिनेट ३०.२८ सेकेण्ड उतरी अक्षाँश रहेको छ । यस्तै जुगल २ मा ६ हजार पाचँ सय १८ मिटरमा ८५ डिग्री ४८ मिनेट ५९.२६ सेकेण्ड पूर्वी देशान्तर छ भने २८ डिग्री १० मिनेट ५३.९१ सेकेण्ड उतरी अक्षाँश छ । जुगल ३ मा अवस्थित ६ हजार १ सय ८४ मिटरमा ८५ डिग्री ४८ मिनेट ४६ .१० सेकेण्ड पुर्वी देशान्तर रहेकोमा २८ डिग्री ०९ मिनेट २९.५४ सेकेण्ड उतरी अक्षाँश रहेको छ ।

जुगल ४ को ५ हजार ९ सय ३६ मिटर छ यहाँ ८५ डिग्री ४९ मिनेट ७.३७ सेकेण्ड पुर्वी देशान्तर र २८ डिग्री ०८ मिनेट ४५ .३२ सेकेण्ड उतरी अक्षाँश रहेको छ । ५ हजार ९ सय २२ मिटर रहेको जुगल ५ मा ८५ डिग्री ५१ मिनेट २८.४१ सेकेण्ड पुर्वी देशान्तर छ भने २८ डिग्री ०८ मिनेट ४७.५९ सेकेण्ड उतरी अक्षाँश रहेको छ ।

जुगल गाउँपालिका अध्यक्ष रेशम स्याङ्बोको अध्यक्षमा अन्तरक्रिया सम्पन्न भएको हो । उनले हिमचुली खुला गर्ने नीति आवश्यकता रहेको बताए । अन्तरक्रियामा पर्यटन विभागका महानिर्देशक होमप्रसाद लुईटेल, गृह मन्त्रालयका उपसचिव फणिन्द्र दाहाल, नापी विभागका बरिष्ठ नापी अधिकृत हरिशरण नेपाल, पर्यटन विभागका निर्देशक युवराज खतिवडा, सूर्यप्रसाद उपाध्याय, नेपाल पर्वतारोहण संघ अध्यक्ष निमा निरु शेर्पा, पर्वतारोहण सञ्चालक संघ नेपालका अध्यक्ष डम्बर पराजुली, ट्रेकिङग एजेन्सिज एसोसियसन अफ नेपालका बरिष्ठ उपाध्यक्ष कृष्णप्रसाद दाहाल, पर्यटन विभागका शाखा अधिकृत दिपेन्द्र रेग्मी, विज्ञान कोईराला, पर्यटन विभागकी सुशिला केसी, गोपाल गिरी, पर्यटन व्यवसायी मिलन तामाङलगायतको उपस्थिति थियो ।