कौराहा नृत्यसहित सांस्कृतिक कार्यक्रम सम्पन्न

चौतारा । ‘सम्पूर्ण मगर विद्यार्थीहरु एक होऔ, शैक्षिक जागरण फैलाऔं’ भन्ने मूल नाराका साथ चौतारा साँगाचोकगढी नगरपालिका– ९ मूलखर्कमा सामूहिक कौराहा नृत्य प्रतियोगितासहितको सांस्कृतिक कार्यक्रम सम्पन्न भएको छ ।

कार्यक्रम चौतारा साँगाचोकगढी नगरपालिका– ९ का वडा अध्यक्ष विमल श्रेष्ठको प्रमुख आतिथ्यमा नेपाल मगर विद्यार्थी संघको २८औं स्थापना दिवसको अवसरमा आयोजना गरिएको थियो । कार्यक्रममा बोल्दै वडा अध्यक्ष श्रेष्ठले मगरहरूको भेषभुषा, संस्कार, संस्कृति संरक्षण गर्नको लागि मगर विद्यार्थीहरु एकजुट भएर अगाडि बढेकोमा खुसी व्यक्त गरे । उनले दिवसको अवसरमा सामूहिक कौराहा नृत्य र निबन्ध लेखन प्रतियोगितामा सफल हुने विद्यार्थीहरुलाई बधाई दिए ।

सामूहिक कौराहा नृत्य प्रतियोगितामा जुगल– ५ का मगर विद्यार्थीहरूको समूह प्रथम, साँगाचोकको विद्यार्थीहरु दोस्रो, भोटसिपाको विद्यार्थीहरु तेस्रो र इर्खुको विद्यार्थीहरु सान्त्वना भएका थिए । त्यसैगरी मावि स्तरीय निबन्ध लेखन प्रतियोगितामा इर्खु माविकी बिनिता तामाङ प्रथम, रत्नराज्य माविकी सुजिता रखाल मगर दोस्रो, गोल्मादेवी माविकी निशा तामाङ तृतीय र जनगागृति माविकी सुदिक्षा राना सान्त्वना भएका थिए । नृत्य प्रतियोगितामा प्रथम, दोस्रो, तेस्रो र सान्त्वना हुनेलाई ट्रफी र प्रमाण पत्र, निबन्ध प्रतियोगितामा प्रथम, दोस्रो, तेस्रो र सान्त्वना हुनेलाई स्टेसनरी सामग्री र प्रमाण पत्र प्रदान गरिएको थियो ।

कार्यक्रममा हाँस्य कलाकार रोहित कार्की, लिजा राना मगरले हास्यव्यङ्ग्य प्रस्तुति दिएका थिए भने गायक सुनिल थापा मगर, दिलिप राना मगर, विरेन्द्र लोप्चनले सांगीतिक प्रस्तुति दिएर मनोरञ्जन प्रदान गरेका थिए । कार्यक्रममा नेपाल मगर विद्यार्थी संघ केन्द्रिय समितिका महासचिव चन्द्र थापा मगर, नेपाल मगर संघ जिल्ला समन्वय समिति सिन्धुपाल्चोकको अध्यक्ष मोहन थापा मगर, आदिवासी जनजाति महासंघ सिन्धुपाल्चोकका उपाध्यक्ष हरिकुमार श्रेष्ठ, नेपाल मगर संघ सिन्धुपाल्चोक काठमाण्डौ सम्पर्क समन्वय समितको अध्यक्ष संगिता राना मगर लगायतका व्यक्तिहरूले शुभकामना दिएका थिए ।

कार्यक्रममा प्रमुख अतिथि विशेष अतिथि र अतिथिहरुलाई मायाको चिनो प्रदान गरिएको थियो । कार्यक्रम नेपाल मगर विद्यार्थी संघ जिल्ला समितिको अध्यक्ष राजेन्द्र राना मगरको सभाध्यक्षतामा सम्पन्न भएको थियो ।