रेडियो सिन्धुद्वारा वार्षिक उत्सवको अवसरमा खाद्य सामग्री सहयोग

चौतारा । सिन्धुपाल्चोकको चौताराबाट सञ्चालन भईरहेको रेडियो सिन्धुले १४ वर्ष पूरा गरेको अवसरमा अपाङ्गता भएका बालबालिकाहरुलाई खाद्य सामग्री सहयोग गरेको छ ।

रेडियो सिन्धुले बुधबार वार्षिक उत्सवको अवसरमा सिन्धुपाल्चोक जिल्लाको चौतारा सागाँचोकगढी नगरपालिका– ५ मा रहेको श्रीकृष्ण आधारभूत विद्यालयमा अध्ययनरत अपाङ्गता भएका बालबालिकाहरुलाई खाद्य सामग्री सहयोग गरेको हो । रेडियो सिन्धुका अध्यक्ष तथा स्टेशन म्यानेजर रत्नप्रसाद श्रेष्ठले बौद्धिक अपाङ्गताका अभिभावक संघ सिन्धुपाल्चोक अध्यक्ष जानकी श्रेष्ठलाई बालबालिकाका लागि खाद्य सामग्री हस्तान्तरण गरे ।

संघको सकृयतामा यो विद्यालयमा ९ जना अपाङ्गता भएका बालबालिकाहरु आवस सहित अध्ययन गर्दै आइरहेका छन् । उक्त खाद्य सामग्री हस्तान्तरण कार्यक्रममा स्टेशन म्यानेजर श्रेष्ठले अपाङ्गता भएका बालबालिकाहरुका लागि सहयोग गर्न पाउँदा आफूहरु खुशी भएको बताए । उनले रेडियो सिन्धुले थप अन्य सहयोग पनि गदै जाने बताए । रेडियो सिन्धुले छुटेका र चपेटामा पारिएका नागरिकका आवाजलाई बुलन्द गर्ने लक्ष्यका साथ रेडियोको स्थापना गरिएको बताए ।

सो कार्यक्रममा बोल्दै नेपाल पत्रकार महासंघ सिन्धुपाल्चोकका अध्यक्ष जीवन श्रेष्ठले सूचना र जानकारी संप्रेषणमा महत्वपूर्ण भूमिका खेल्दै आएको रेडियो सिन्धुले सामाजिक उत्तरदायित्व पनि निर्वाह गरेकोमा प्रशंसा गरे । त्यस्तै संघकी अध्यक्ष जानकी श्रेष्ठले बार्षिकोत्सवको उपलक्ष्यमा अपाङ्गता भएका बालबालिका लागि रेडियोले उपलब्ध गराएको सहयोगले ठूलो राहत पुगेको बताईन् ।

खाद्यान्न वितरण कार्यक्रमको औपचारिक कार्यक्रममा रेडियो सिन्धुका कोषाध्यक्ष दीलमाया खड्का, समाचार प्रमुख टीका दाहाल, सम्झाना कार्की, अश्मी स्याङ्तान, पासाङ ह्यल्मो लगायतको उपस्थिति थियो ।