कसजूलाई अग्रज सम्मान पत्रकारिता पुरस्कार प्रदान

हेटौंडा । ३४ वर्ष पत्रकारिता क्षेत्रमा क्रियाशिल सिन्धुपाल्चोकका पत्रकार सुरेश कसजू अग्रज सम्मान पत्रकारिता पुरस्कारबाट पुरस्कृत भएका छन् ।

१६औं गणतन्त्र दिवसको अवसरमा बागमती प्रदेश सरकारले कसजुलाई २० हजार रुपैंया नगदसहित अग्रज सम्मान पत्रकारिता पुरस्कार प्रदान गरेको हो । २०४६ सालदेखि निरन्तरता पत्रकारितामा समर्पित कसजू अहिले पनि पत्रकारितामा उत्तिकै सक्रिय र क्रियाशिल छन् । कसजूले अहिले सर्वपक्ष दैनिक, जुगलखबर डटकम र सिन्धु सन्देश साप्ताहिक प्रकाशन गरिरहेका छन् । उनी गोरखापत्र संस्थानका पूर्व बोर्ड सदस्य समेत हुन् ।

दिवसको अवसरमा कसजूसँगै ६ जना पत्रकार पुरस्कृत भएका छन् । ग्रामिण पत्रकारीता पुरस्कारबाट शिवकुमार काशी (मकवानपुर), बागमती पत्रकारिता पुरस्कारबाट प्रभु जिरेल (दोलखा), विकास पत्रकारिता पुरस्कारबाट अनिल ढकाल (चितवन), प्रदेश गौरव पत्रकारिता पुरस्कारबाट शक्तिमाया तामाङ (नुवाकोट) र प्रदेश युवा पत्रकारिता पुरस्कारबाट विक्रम रत्न (सिन्धुली) सम्मानित भएका हुन । पुरस्कृत हुने पत्रकारहरुलाई २० हजार रुपैंयासहित प्रमाणपत्र प्रदान गरिएको थियो ।

बागमती प्रदेशका मूख्यमन्त्री शालिकराम जम्कट्टेलले सोमबार प्रदेश राजधानी हेटौंडामा एक समारोहकाबीच पत्रकारहरुलाई पुरस्कारसहित सम्मान प्रदान गरेका हुन । बागमती प्रदेशभित्रका क्रियाशिल र लामो समय पत्रकारितामा समर्पित पत्रकारहरुलाई पुरस्कृत गर्दै लाने उदेश्यका साथ यो पुरस्कारको शुरुआत गरिएको पुरस्कार छनौट समितिका संयोजक एवम् बागमती प्रदेशका प्रेस रजिष्ट्रार रेवतीप्रसाद सापकोटाले बताए ।