गणतन्त्र दिवसको अवसरमा प्रविधि प्रयोग सम्बन्धी कार्याशाला

चौतारा । १६औं गणतन्त्र स्थापना दिवसको अवसर पारेर चौतारा बहुमुखी क्याम्पसले कक्षाकोठामा प्रविधिको प्रयोगबारे कार्यशाला गोष्ठी गरेको छ ।

‘प्रविधिमैत्री शिक्षा, आजको आवश्यकता’ भन्ने मूल नाराका साथ आयोजना गरिएको कार्यशालामा सानोठिमी क्याम्पस भक्तपूरका आईसिटी विभागका उपप्राध्यापक गोविन्द न्यौपानेले सहभागिहरुलाई प्रत्यक्ष अभ्यास गराई प्रविधि प्रयोगबारे जानकार गराएका थिए । कार्यशालामा चौतारामा क्याम्पसका उपप्राध्यापकहरुको सहभागिता थियो ।

दुई चरणमा सञ्चालन गरिएको कार्यशालाको पहिलो चरणमा प्रविधिको सैद्धान्तिक जानकारी र दोस्रो चरणमा प्रयोगात्मक अभ्यास गराईएको थियो । कार्यक्रमलाई प्रभावकारी बनाउन उपप्राध्यापकहरुको सक्रिय सहभागिता रहेको क्याम्पसका उपप्राध्यापक जगतमणी सोतीले जानकारी दिए ।

शिक्षण प्रकृयालाई प्रविधिमैत्री तथा प्रभावकारी बनाउने उद्देश्यका साथ आयोजना गरिएको कार्याशालाले सूचना र प्रविधिको प्रयोगमा क्याम्पसका उपप्राध्यापकहरुलाई प्रविधिको प्रयोग गर्न अझ बढी सक्षम बनाएको क्याम्पस प्रमुख नगेन्द्रप्रसाद दंगालले बताए ।