नगरस्तरीय वतृत्वकलामा श्रेष्ठ प्रथम

चौतारा । १८औं जातीय छुवाछुत उन्मूलन राष्ट्रिय दिवसको अवसर पारेर चौतारामा गरिएको नगरस्तरीय वतृत्वकला प्रतिगोगितामा दक्षिणकाली माविकी छात्रा स्मारिका श्रेष्ठ प्रथम भएकी छिन् ।

प्रतियोगितामा सेतीदेवी माविकी सन्ध्या श्रेष्ठ द्वितीय, सेतीदेवी पञ्चकन्या माविकी सलिना भण्डारी तृतीय र श्री कृष्ण रत्नगंगा माविकी निहारीका मास्के सान्त्वना भईन् । नगर दलित समन्वय समिति चौतारा साँगाचोकगढी नगरपालिकाको आयोजनामा भएको प्रगियोगिताको विजेताहरुलाई क्रमस २ हजार, १ हजार ५ सय, १ हजार र पाँचसय रुपैंयासहित प्रमाणपत्र प्रदान गरिएको थियो ।

चौतारा साँगाचोकगढी नगरपालिकाका प्रमुख कृष्णप्रसाद सापकोटाले विजेताहरुलाई नगदसहित प्रमाणपत्र प्रदान गरेका थिए । प्रतियोगिहरुको मूल्याङ्कन नेपाल राष्ट्रिय बुद्धिजीवि संगठन सिन्धुपाल्चोकका अध्यक्ष गोपाल खड्का, प्रगतिशील लेखक संघ बागमती प्रदेशका सचिव सुन्दर शिरीष र प्रगतिशील लेखक संघ सिन्धुपाल्चोकका सचिव दील कार्कीले गरेका थिए ।

सो अवसरमा नगरपालिकाका प्रमुख कृष्णप्रसाद सापकोटाले शताब्दीऔंसम्म विभेद र अन्यायको शिकार भएका दलित समुदायलाई शिक्षा, स्वास्थ्य र रोजगारको क्षेत्रमा अगाडि बढाउन स्थानीय सरकार तल्लीन रहेको बताए । ‘जनयुद्ध र त्यसपछिका परिवर्तनले दलित समुदायमाथी हुँदै आएको विभेदलाई केहि हदसम्म भएपनि न्यूनिकरण गरेको छ’, उनले भने– ‘अब लामो संघर्ष र बलिदानबाट प्राप्त हक अधिकारलाई पूर्ण कार्यान्वयनमा लैजान प्रेरित हुनुपर्दछ ।’

सापकोटाले जातीय छुवाछुतरहित नगरपालिका घोषणा गर्ने अभियान नगरको नीति कार्यक्रममै समावेश गरी सञ्चालन गर्ने उद्घोष गर्दै सो अभियानलाई सार्थक बनाउन सबै जुट्न आग्रह गरे । ‘हामीले हाम्रो समाजलाई कस्तो बनाउने भन्ने कुराको निर्धारण हामी आफैंबाट हुन्छ’, सापकोटाले भने– ‘परिवर्तनको सुरुवात आाफैंबाट गर्नुपर्छ, अनिमात्र समाज परिवर्तन हुनसक्छ ।’

कार्यक्रममा नेकपा (माओादी केन्द्र) जिल्ला संयोजक गोविन्द पराजुली, नेपाल दलित मुक्ति मोर्चाको उपमहासचिव गणेश विक, नेपाल उत्पीडित जातीय मुक्ति समाजका केन्द्रीय सचिवालय सदस्य चन्द्र धिमालकोटी, नेकपा (एमाले) का जिल्ला सचिव रामचन्द्र बस्नेतलगायतले जातीय विभेद र छुवाछुतको अवस्थाबारे आफ्ना धारणा राखेका थिए ।

चौतारा साँगाचोकगढी नगरपालिकाको सहयोगमा भएको कार्यक्रमको सञ्चालन नेपाल दलित मुक्ति मोर्चा बागमती प्रदेश समितिको सचिव रामशरण विकले गरेका थिए । कार्यक्रममा नगरभरका दलित अधिकारकर्मी, जनप्रतिनिधि, बुद्धिजीवि, शिक्षक, विद्यार्थी, अभिभावकहरुको उपस्थिति रहेको थियो ।

१ जेठ २०६३ मा संसदले नेपाललाई छुवाछुतमुक्त राष्ट्र घोषणा गरेको सम्झनामा २०६८ देखि यो दिवस मनाउन शुरु गरिएको हो ।