विद्यालय कर्मचारीले बुझाए ध्यानाकर्षणपत्र

चौतारा । नेपाल विद्यालय कर्मचारी परिषद् जिल्ला कार्य समिति सिन्धुपाल्चोकले विभिन्न माग राख्दै शिक्षा विकास तथा समन्वय इकाईलाई ज्ञापनपत्र बुझाउँदै ध्यानाकर्षण गराएको छ ।

विद्यालय लेखा कर्मचारीहरुको लागि महंगीभत्तासहित ३६ हजार ७ सय ३० रुपैंया तलब प्रदान गरिनुपर्ने, विद्यालय सहयोगी कर्मचारीले २६ हजार ९ सय २० रुपैंया तलब तत्काल पाउनुपर्ने परिषद्को माग छ । परिषद्को जिल्ला अध्यक्ष मनोरथ दुलालले तेस्रो राष्ट्रिय सम्मेलनले जारी गरेको घोषणापत्र अनुरुप शिक्षा विकास तथा समन्वय इकाईलाई मागसहितको ध्यानाकर्षण पत्र बुझाईएको बताए ।

परिषद्ले स्थानीय शिक्षा ऐनमा ३ बुँदाको व्यवस्था गर्नसमेत ध्यानाकर्षण गरेको छ । जिल्लाका सम्मूर्ण विद्यालयमा विद्यालय कर्मचारी दरबन्दी शिक्षा तथा मानव स्रोत विकास केन्द्रमार्फत नेपाल सरकारसमक्ष माग गरिनुपर्ने, ६० वर्ष उमेर पुगेका विद्यालय कर्मचारीहरुको लागि आवकास हुन बाध्य पारिएका विद्यालयमा संघीय शिक्षा ऐन जारी नहुँदासम्म उक्त कार्य रोक्नुपर्ने, अवकाशित विद्यालय कर्मचारीलाई एमकुष्ट अनुदान उपलब्ध गराउने व्यवस्था मिलाउनुपर्ने परिषद्ले माग गरेको छ ।