प्रधानमन्त्री प्रचण्डद्वारा मेलम्ची खानेपानी आयोजनाको स्थलगत अवलोकन

मेलम्ची । प्रधानमन्त्री पुष्पकमल दाहाल ‘प्रचण्ड’ले मेलम्ची खानेपानी आयोजनाको स्थलगत अवलोकन भ्रमण गरेका छन् ।

शनिबार विहान मेलम्ची क्षेत्र पुगेका उनले हेलम्बु गाउँपालिका वडा नम्बर १ अम्बाथानमा रहेको मेलम्ची खानेपानी आयोजनाको मुहानमा पुगी मेलम्ची आयोजनाको स्थलगत निरीक्षण गर्दै आयोजनाका कर्मचारीहरुसँग जानकारी लिएका हुन् ।

मेलम्चीको संरचना मर्मतमा ढिलाई भईरहेको भन्ने जानकारी पाएपछि आफू स्थलगत अवलोकनको लागि आएको उनले प्रष्ट्याए । उनले मेलम्चीमा आएको बाढीले आसपासका ४ सय घरपरिवार नष्ट भएको र ती क्षेत्रका जनताले भोग्नुपरिरहेको समस्याका बारेमा समेत जानकारी लिएका थिए । ‘कहाँ के गर्नुपर्छ भन्ने एउटा चित्र आएको छ । बजेटसँग सम्बन्धित बिषयहरूलाई प्राथमिकतामा राखिने छ’, उनले भने । आफू बाटोमा आउँदा देखेको सडकको दुरावस्थालाई पनि गम्भीरतापूर्वक लिएको दाहालले बताए ।

प्रधानमन्त्री दाहालले याङ्ग्री र लार्के खोलाबाट थप पानी ल्याउने विषयमा काठमाडाँै पुगेर गृहकार्य गर्ने बताए । त्यसका लागि आवश्यक बजेटको व्यवस्था मिलाउने उनको भनाई थियो । खानेपानी नागरिकको प्रत्यक्ष सरोकारको विषय भएको बताउँदै राष्ट्रिय गौरवको आयोजनाका रुपमा रहेको मेलम्ची खानेपानी आयोजनाले प्रतिफल दिनुपर्ने उनको भनाई थियो ।

प्रधानमन्त्री दाहालले आयोजनाको मुहान, मूख्य सुरुङ रहेको अम्बाथान क्षेत्र र मेलम्ची खानेपानी आयोजनाका सम्पूर्ण पक्षकोबारे जानकारी लिएका थिए । आयोजनाका बारेमा मेलम्ची खानेपानी विकास समितिका कार्यकारी निर्देशक कमलराज श्रेष्ठले प्रधानमन्त्रीलाई जानकारी गराए ।

निर्देशक श्रेष्ठले बाढीपहिरोको सम्भावित जोखिमबाट आयोजनालाई बचाउन अहिलेसम्म कुनै ठोस उपाय अपनाउन नसकेको स्वीकारे । उनले बाढीको समयमा आयोजनाको गेट नं. १ र ९ लाई बन्द गर्न सकिने तथा धमिलो पानीलाई सफा गर्न सकिने प्रणाली जडान गरिएको भएपनि आयोजनाको मुहान, हेडवक्र्स र सुरुङसम्म बाढी पहिरोलाई आउन नदिन संरचना बनाउन नसकिएको जनाए ।

प्रधानमन्त्री दाहालसँगको भेटमा हेलम्बु गाउँपालिकाका अध्यक्ष निमा ग्याल्जेन शेर्पाले मेलम्ची खोला र सो क्षेत्रमा आउन सक्ने बाढीपहिरोको रोकथाम तथा जोखिमबाट बच्न कुनै उपाय नअपनाइएको बताए । उनले हेलम्बु क्षेत्रका बासिन्दा जोखिम र त्रासमा नै बाँच्नु परेको भन्दै आमनागरिकको जिउधनको क्षति हुन नदिन बेलैमा बाढीपहिरोबाट यस क्षेत्रलाई बचाउने गरी आवश्यक संरचना निर्माण गरिदिन संघ र प्रदेश सरकारलाई पटक पटक आग्रह गर्दा पनि अहिलेसम्म सुनुवाइ नभएको बताए ।

प्रधानमन्त्री दाहालसँगै स्थलगत अवलोकनमा खानेपानी मन्त्री महिन्द्र राय यादव समेत आएका थिए । प्रधानमन्त्रीको टोलीलाई स्वास्थ्य तथा जनसंख्या मन्त्री मोहनबहादुर बस्नेत, बागमती प्रदेशका भौतिक पूर्वाधारमन्त्री युवराज दुलाल, बागमती प्रदेशसभा सदस्य सरल सहयात्री पौडेल, मेलम्ची नगरपालिकाका प्रमुख आइतमान तामाङलगायतले मेलम्चीमा स्वागत गरेका थिए ।

दुई वर्षअघि २०७८ असार १ र साउन १६ गते मेलम्ची खोलामा आएको बाढीले मेलम्ची खानेपानी आयोजनालाई क्षति पुर्याएको थियो । तर अहिलेसम्म आयोजनाको बाँध, अडिट सुरुङ, हेडवक्र्स, पुल, प्रवेश मार्ग र अन्य भौतिक संरचना पुनर्निर्माण वा मर्मतका पूर्ण रुपमा सम्पन्न भईसकेको छैन ।