फोनिजद्वारा १२ बुँदे ‘चौतारा घोषणापत्र’ जारी

चौतारा । नेपाल आदिबासी जनजाति पत्रकार महासंघ (फोनिज) बागमती प्रदेशले २४औं फोनिज स्थापना दिवस १२ बुँदे चौतारा घोषणापत्र जारी गर्दै सम्पन्न गरेको छ ।

शुक्रबार सिन्धुपाल्चोक जिल्लाको चौतारामा सम्पन्न (फोनिज) बागमती प्रदेश (नेवा–ताम्सालिङ) समितिको आयोजना र फोनिज सिन्धुपाल्चोकको व्यवस्थापनमा २९औं विश्व आदिबासी दिवस तथा फोनिजको २४औं स्थापना दिवसको अवसरमा नेपालको आदिबासी जनजाति आन्दोलन र फोनिजको भूमिका विषय अन्तक्रिया कार्यक्रम गरी मनाइएको हो ।

घोषणापत्रमा समानुपातिक विज्ञापन प्रणाली तीनै तहमा लागु गर्नुपर्ने, जनजाति पत्रकारहरुको वृत्तिविकासमा जोड दिनुपर्ने, पत्रकार महासंघले पत्रकार शुद्धिकरण अभियानमा आदिवासी जनजाति भएकै कारण विभेद गर्न नहुने, जनजातिको मैलिक संस्कृतिमाथी कसैले धावा बोल्न नपाईने लगायतका विषय समेटिएका छन् ।

कार्यक्रमलाई सम्बोधन गर्दै जिल्ला समन्वय समिति सिन्धुपाल्चोकका प्रमुख बालकृष्ण श्रेष्ठले नेपालमा भएका सामाजिक, राजनीतिक परिवर्तनको उतारचढाबमा आदिवासी जनजातिहरुले अतुलनिय योगदान रहेको औंल्याएका छन् । उनले जनजातिहरुले सदियौं वर्षदेखि आफ्नो अस्तित्व रक्षा, आफ्नो भाषा संस्कृति, परम्परा जोगाउनको निम्ति संगठित रुपमा होस् वा असंठनिक रुपमा आदिवासी जनजातीहरुको त्याग तपस्या, बलिदानले नै समानुपातिक, समावेसी तथा धर्मनिरपेक्ष संघिय लोकतान्त्रीक गणतन्त्र राज्य संरचना स्थापित भएको जनाएका छन् ।

‘आयातित भाषा धर्म, संस्कृतिको प्रभावका कारण ओझेलमा पर्दै गएको जनजातिहरुको आफ्नो पहिचानसहितको राज्य संरचनाको निम्ति एक जुट भई आफ्नो भाषा, धर्म संस्कृति, परम्परा र अस्तित्वको संघर्षमा निरन्तर लागिरहनु पर्ने देखेको छु,’ उनले भने ।

यसैगरी फोनिज स्थापना दिवसको अवसरमा सिन्धुपाल्चोक जिल्लामा रही लामो समयसम्म पत्रकारीता पेशा गरिरहेका अग्रज जनजाति पत्रकार ङेम्लिङ लामा सम्मानित भएका छन् । लामाले सम्मान पत्रका साथै नगद रु. पाँच हजार सम्मान स्वरुप प्रप्त गरेका छन् । भने कार्यक्रममा विभिन्न जिल्लामा उपस्थित अतिथिहरुलाई सिन्धुपाल्चोक जिल्ला अध्यक्ष लालकाजी तामाङले मायाँको चिनो प्रदान गरेका थिए । कार्यक्रम फोनिज बागमती प्रदेशका अध्यक्ष युवराज श्रेष्ठको अध्यक्षतामा भएको थियो ।