स्थानीय तहका कर्मचारी आन्दोलित, निजामती दिवस बहिस्कार गर्ने

बलेफी । स्थानीय तहमा कार्यरत कर्मचारीहरूको सेवा सुविधा र वृद्धि विकासको सुनिश्चितता नभएको भन्दै सिन्धुपाल्चोकको बलेफी गाउँपालिकाका कर्मचारी आन्दोलित भएका छन्।

गाउँपालिकाको प्रमुख प्रशासकीय अधिकृत रेवन्त दाहाललाई मंगलबार ८ बुँदे मागसहितको संयुक्त विज्ञप्ति बुझाउँदै कर्मचारीहरूले आन्दोलनको घोषणा गरेका हुन्। प्रस्तावित संघीय निजामती ऐनको मस्यौदाप्रति विमति जनाउँदै उनीहरूले राखेको ८ बुँदे माग सम्बोधन नभए भदौ २२ गते मनाइने निजामती सेवा दिवस बहिस्कार गर्ने र कालो पट्टी बाँधी विरोध जनाउने बताएका छन्।

प्रशासनिक संरचनामा संघीय निजामती सेवा, प्रदेश निजामती सेवा र स्थानीय सेवा भने विभेदकारी नीति राखिएप्रति कर्मचारीको विमति छ। संघीय निजामती सेवा ऐन नभई एकीकृत निजामती सेवा ऐन ल्याउनुपर्ने, सेवा समूहका आधारमा सरकारी सेवाको प्रवेशद्वार स्थानीय सेवामा मात्र हुनुपर्ने, सरुवा प्रणालीलाई सहमतिका आधारमा नभई अनुमानयोग्य चक्रीय रूपमा गर्नुपर्ने कर्मचारीहरूको माग छ।

त्यस्तै अन्तरप्रदेश सरुवाको व्यवस्था एकीकृत निजामती सेवा ऐनमा नै खुलाउनुपर्ने, निजामती अस्पतालमा सबै सरकारी कर्मचारीहरूलाई समेट्नुपर्ने, संघ, प्रदेश र स्थानीय तहका कर्मचारीहरूको सेवासुविधा र वृद्धि विकास सम्बन्धमा विभेद नभई समान हुनुपर्ने, प्रमुख प्रशासकीय अधिकृतको पद स्थानीय सेवा अन्तर्गतको सेवा मध्येबाट हुनुपर्ने र स्थानीय सेवामा कार्यरत कर्मचारीहरूको पूर्ण सुरक्षाको प्रत्याभूति हुनुपर्ने उनीहरूको माग छ।

ज्ञापनपत्र बुझाउँदै बलेफी गाउँपालिकाका पशु सेवा प्राविधिक दिपेन्द्र दंगालले सरकारले कर्मचारीलाई विभेद गरेको जनाए। प्रस्तावित संघीय निजामती ऐनको मस्यौदामा आफ्ना मागहरूलाई नसमेटिए थप आन्दोलन गर्ने उनले चेतावनी दिए।

ज्ञापनपत्र बुझ्दै प्रमुख प्रशासकीय अधिकृत रेवन्त दाहालले कर्मचारीहरूको मागलाई सम्बन्धित निकायमा पुर्‍याउने बताए। संघीय मामिला तथा सामान्य प्रशासन मन्त्रालयले भदौ २२ गते स्थानीय सरकारलाई निजामती सेवा दिवस मनाउन पत्राचार गरेको थियो। मन्त्रालयले कर्मचारीप्रति ध्यान नदिई दिवसलाई मात्रै महत्व दिएको उनीहरूको आरोप छ।