मित्रता संघको अध्यक्षमा तामाङ

चौतारा । चौतारा साँगाचोकगढी नगर पालिका वडा नं ९ जितपुरमा रहेको मित्रता संघको अध्यक्षमा मंगले तामाङ निर्वाचित भएका छन् ।

शुक्रबार गोल्मादेवी माद्यमिक विद्यालयमा भएको ९औं अधिवेशन एवम् १३औं वार्षिक साधारणसभाले तामाङको अध्यक्षतामा ११ सदस्यीय सर्वसम्मत् निर्वाचित गरेको हो । उपाध्यक्षमा कृष्णबहादुर आराण, सचिवमा गंगा तामाङ र कोषध्यक्षमा ज्ञानीमाया तामाङ निर्वाचित भएका हुन् । त्यस्तै सदस्यहरुमा हरि भारती, प्रेमबहादुर तामाङ, लोपन लामा, लालकाजी तामाङ, अस्मिता तामाङ, रिता तामाङ र रामबहादुर तामाङ सर्वसम्मत निर्वाचित भएको संघको कार्यकारी निर्देशक विष्णु लामाले जानकारी दिए ।

संघले हाल ३५ जना गरीब, असाहय बालबालिकालाई आवाससहितको शिक्षा प्रदान गरिरहेको छ । कार्यक्रमलाई सम्बोधन गर्दै चौतारा साँगाचोकगढी नगरपालिकाका प्रमुख कृष्णप्रसाद सापकोटाले मित्रता संघले असहाय बालबालिकाहरुलाई शिक्षामा पहुँच पुर्याउन गरेको योगदानलाई सम्मान गर्नुपर्ने बताए । सरकारले गर्नुपर्ने कर्तव्यलाई एउटा सामाजिक संस्थाले गर्नु भनेको गर्वलायक भएको उनको भनाई थियो ।

मित्रता संघलाई गतिशील बनाउन नगरपालिका सदैव तत्पर रहेको भन्दै नगरप्रमुख सापकोटाले सकारात्मक सोच राखेर सामाजिक कार्यमा लाग्न संघलाई आग्रह गरे । पूर्वाग्रह र संकृणताले समाजलाई उन्नति हुन नदिने बताउँदै उनले आफ्नो पथमा निरन्तर लाग्नुपर्नेमा जोड दिए ।

कार्यक्रममा संघको कार्यकारी निर्देशक विष्णु लामाले आर्थिक वर्ष २०७९/८० को प्रगति एवम् आर्थिक प्रतिवेदन प्रस्तुत गरेका थिए । उनले बालबालिकालाई शिक्षित, सवल, सक्षम, आत्मनिर्भर बनाउँदै गुणस्तरीय शिक्षाको विकास गर्नु संघको लक्ष्य रहेको बताउँदै बालमैत्री समाजको लागि शिक्षामार्फत आर्थिक विकासमा सम्मान सहभागिता सुनिश्चित गर्न संघ लागिरहेको बताए । संघले समुदायमा आधारित कार्यक्रम अन्र्तगत स्थानीयको आयआर्जनमा टेवा पुर्याउनने, स्वास्थ्यमा पहुँच पुर्याउन विभिन्न स्वास्थ्यका कार्यक्रम सञ्चालन गरेको लामाको भनाई थियो ।

कार्यक्रममा चौतारा साँगाचोकगढी नगरपालिका महिला बालबालिका शाखा प्रमुख दुर्गाप्रसाद ढुङ्गेलले सामाजिक लेखा परीक्षणको प्रतिवेदन प्रस्तुत गरेका थिए । कार्यक्रमको उद्घाटन सत्रमा मासमाजसेवी सिताराम गिरी, प्रेस सेन्टर नेपाल जिल्ला समन्वय समिति सिन्धुपाल्चोकका अध्यक्ष सुन्दर शिरीष, समाजसेवी एवम् शिक्षक कृष्णबहादुर तामाङ, गोल्मादेवी माविका प्रधानाध्यापक ज्ञानबहादुर तामाङ लगायतले अधिवेशन एवम् वार्षिक साधारणसभाको सफलताको शुभकामना व्यक्त गरेका थिए ।

कार्यक्रमका बीच बालबालिकाले नृत्य प्रस्तुत गरी मनोरञ्जन प्रदान गरेका थिए । सो कार्यक्रम संघका अध्यक्ष हरिचन्द्र भारतीको अध्यक्षतामा भएको थियो ।