सिन्धुपाल्चोक ७ पालिकाले तिरेनन् विद्युत महसुल 

चौतारा । नेपाल विद्युत प्राधिकरणले बिजुली महसुल नतिर्ने स्थानीय तहको नाम सार्वजनिक गरेको छ । महसुल नतिर्नेमा सिन्धुपाल्चोकका ७ स्थानीय तह छन् ।

७ स्थानीय तहले सडक बत्तीको विद्युत महसुल वापतको ३ लाख ७३ हजार ६ रुपैंया १ पैसा नतिरेको प्राधिकरणले दिएको छ । प्रधिकरणको अनुसार सबैभन्दा बढी बक्यौता बलेफी गाउँपालिकाको छ । बलेफीले १ लाख ५७ हजार ४ सय ६८ रुपैंया ५६ पैसा प्रधिकरणलाई तिर्न बाँकी छ ।

चौतारा साँगाचोकगढी नगरपालिकाले ९५ हजार २ सय ३९ रुपैंया ३९ पैसा, बाह्रविसे नगरपालिकाले ४२ हजार ६ सय १६ रुपैंया २४ पैसा, सुनकोशी गाउँपालिकाले ३० हजार ४ सय १३ रुपैंया ४६ पैसा, जुगल गाउँपालिकाले २९ हजार १ सय ६ रुपैंया, मेलम्ची नगरपालिकाले १५ हजार ४ सय ६८ रुपैंया ७५ पैसा र लिसंखुपाखर गाउँपालिकाले २ हजार ६ सय ९३ रुपैंया ७० पैसा तिर्नुपर्ने प्राधिकरणले जनाएको छ ।

प्राधिकरणले सूचना जारी गर्दै ४५ दिन भित्र महसुल बुझाउन भनेको छ । तोकिएको समयभित्र महसुल नबुझाए कारबाही गर्ने चेतावनी प्राधिकरणले दिएको छ । यस्तै, प्राधिकरणले अनुमति नलिई बिना मिटर आफूखुसी सडकबत्ती जडान नगर्न समेत आग्रह गरेको छ । अनधिकृत रुपमा सडकबत्ती राखेमा प्राधिकरणले हटाउने चेतावनी दिएको छ ।