युवा, विद्यार्थीलाई साइबर क्राइमबारे सचेतना

चौतारा । विभिन्न शैक्षिक संस्थाका विद्यार्थीहरुलाई चौतारामा साइबर क्राइमबारे सचेतना प्रदान गरिएको छ ।

जिल्ला युवा समिति सिन्धुपाल्चोकको आयोजना एवम् जिल्ला प्रहरी कार्यालयको समन्वयमा भएको सचेतना कार्यक्रममा साईबर क्राईम हुने अवस्थाको पहिचान गरी कानुनी उपचारको बारेमा जानकारी गराइएको हो । जिल्ला युवा समिति सिन्धुपाल्चोकको युवा स्वम्सेवक रुपक दुलालले समाजमा नयाँ अपराधको रुपमा सिर्जना भइरहेकोले युवा तथा विद्यार्थीहरुलाई समयमै जागरुक बनाउन सचेतना कार्यक्रम गरिएको बताए ।

समाजमा विकृतिको रुपमा रहेको साईबर क्राईमबारे जिल्ला प्रहरी कार्यालय सिन्धुपाल्चोकका प्रहरी निरीक्षक सञ्जिव कुमार यादवले बिस्तृत जानकारी दिएका थिए । विद्युतीय ऐन अन्तर्गत साईबर क्राईमको आरोपितलाई हुने कारवाही र यसका कानुनी उपचारका बारेमा सहजिकरण गर्दै त्यसबारेमा युवा विद्यार्थीहरु सचेत हुनुपर्ने धारणा उनको थियो ।

‘साईबर क्रार्ईम न्यूनिकरणका लागि प्रहरी र समुदाय सँगसँगै अघि बढ्नु आवश्यक छ’, यादवले भने । साईबर क्राईम युवाहरुको माझ विकृतिकोरुपमा रहेकाले यसबाट बच्नका लागि आवश्यक जानकारी लिन नितान्त आवश्यक रहेकोले अभिभावक समेतको चासो हुनुपर्ने उनको सुझाव थियो ।

सचेतना कार्यक्रममा विशेष अतिथि नेपाल पत्रकार महासंघ बागमती प्रदेश परिषद् सदस्य एवम् प्रेस सेन्टर नेपाल सिन्धुपाल्चोकका अध्यक्ष सुन्दर शिरीषले प्रविधिको विकास उच्च गतिमा बढिरहेको र यसको सहि सदुपयोग गर्नुपर्नेमा जोड दिए । ‘प्रविधिले हामीलाई सूचनासँग नजिक हुन सघाईरहेको छ’, उनले भने– ‘यसको दुरुपयोग नगरी सदुपयोग गर्न सके समाज विकासमा सघाउ पुग्दछ ।’

प्रविधिको विकाससँगै दुरुपयोगको खतरा बढिरहेको बताउँदै शिरीषले यसको रोकथाम गर्न युवा विद्यार्थीहरुको भूमिका महत्वपूर्ण रहने जनाए । ‘अहिले प्रविधिको दुरुपयोग गरी आपराधिक क्रियाकलापमा संलग्न हुने घटनाहरु बढिरहेको छ’, उनले भने– ‘युवा विद्यार्थीहरु यसप्रति रचेत रहँदै आपराधिक गतिविधि मुक्त समाज बनाउन अग्रसर हुन जरुरी छ ।’

कार्यक्रममा दिनेश रामजी बहुप्राविधिक शिक्षालय, जुगल बोर्डिङ माद्यमिक विद्यालयका विद्यार्थीहरु, युवा, शिक्षक शिक्षिका, सञ्चारकर्मी लगायतको उपस्थिती थियो ।