स्वास्थ्य स्वयंसेविकालाई स्वास्थ्य उपकरण हस्तान्तरण

चौतारा । सिन्धुपाल्चोक अन्तर्राष्ट्रिय समाजको संयोजनमा जिल्ला भरिका २४ वटा वडाका स्वास्थ्य स्वयंसेविकाहरुलाई १ सय ५० थान ब्लड प्रेसर नाप्ने उपकरण स्फिग्मोम्यानोमिटर वितरण गरिएको छ ।

‘अति आवश्यक पर्ने स्वास्थ्य उपकरण स्थानीय स्वास्थ्य निकायहरुमा वितरण गरौ, आफन्तको ज्यान बचाऔं’ भन्ने नाराका साथ सिन्धुपाल्चोक समाज दक्षिण कोरिया, सिन्धुपाल्चोक सेवा समाज यूएई, सिन्धुपाल्चोक अन्तर्राष्ट्रिय सेवा समाज साउदी अरब, कुवेत, सिन्धुपाल्चोक प्रवासी सेवा समाज कतार लगायत विभिन्न देशमा रहेका सिन्धुवासी प्रवासीहरुले सञ्चालन गरेको अभियानद्वारा विभिन्न दाताले दिएको सहयेगबाट स्वास्थ्य सामग्रीहरु खरीद गरि उपलब्ध गराइएको सिन्धुपाल्चोक अन्तर्राष्ट्रिय समाजका महासचिव उत्सव खड्काले जानकारी दिए ।

जिल्लाको बलेफी ५ मा रहेको बलेफी माविको ७५औं अभिभावक दिवसको अबसर पारेर आयोजित कार्यक्रममा सिन्धुपाल्चोक अन्तर्राष्ट्रिय समाजले नेपाल सरकारको स्वस्थ्य तथा जनसंख्या मन्त्री मोहनबहादुर बस्नेतबाट बलेफी ४, ५, ६, ७, ८ का वडाका महिला स्वास्थ्य स्वयंसेविकाहरुलाई उपकरण प्रदान गर्दै अभियानको सुरुवात गरिएको सिन्धुपाल्चोक अन्तराष्ट्र्रिय समाजका उपाध्यक्ष माधव पौडेलले बताए ।

आवश्यकतालाई हेरी स्थानीय निकायहरु र स्वास्थ्य शाखा तथा स्वास्थ्यकर्मीहरुसँग समन्वय गर्दै समाजले चौतारा साँगाचोकगढी नगरपालिका, बाह्रबिसे नगरपालिका, सुनकोशी, भोटेकोशी, बलेफी गाउँपालिकाका विभिन्न वडाहरुका गई महिला स्वास्थ्य स्वयंसेविकाहरुलाई प्रेसर नाप्ने उपकरण वितरण गरेको हो ।