ज्ञानमन्दिरले जित्यो नगरस्तरीय फुटबल प्रतियोगिताको उपाधी

चौतारा । दोस्रो चौतारा स्पोर्टिङ क्लव नगरस्तरीय ७ ए साइड फुटबल प्रतियोगिताको उपाधि चौतारा साँगाचोकगढी नगरपालिका– ७ स्थित ज्ञानमन्दिर नमूना मावि मेलचौरले जितेको छ ।

शनिबार भएको फाईनल खेलमा ज्ञानमन्दिर नमूना मावि मेलचौर र सेतीदेवी मावि स्याउलेबीच दुई—दुई बराबर गोल भएपछि खेल पेनाल्टी सुटआउटमा पुगेको थियो । पेनाल्टी सुटआउटबाट ज्ञानमन्दिरले २–० गोल अन्तरमा उपाधी हात पारेको हो । प्रतियोगिताको विजयी टिम ज्ञानमन्दिरले नगद ३० हजारसहित शिल्ड, मेडल तथा प्रमाणपत्र पुरस्कार पाएको छ । उपविजेता सेतीदेवी मावि स्याउलेले २० हजार, शिल्ड, मेडल तथा प्रमाणपत्रमा चित्त बुझाएको छ ।

प्रतियोगिताको उत्कृट गोलरक्षक, डिफेन्डर, मिडफिल्डर, स्ट्राइकर, सर्वाधिक गोलकर्ता र सर्वाेत्कृष्ट खेलाडीले ट्रफी पुरस्कार पाएका छन् । प्रतियोगिताको बिजेता विद्यालय तथा खेलाडीलाई नगर उपप्रमुख सीता थापा, सामाजिक विकास शाखाका संयोजक एवम् वडा नं. १३ का अध्यक्ष रामप्रसाद गौतम, वडा नं. ५ का अध्यक्ष शिव श्रेष्ठलगायतले ट्रफी, मेडल, प्रमाणपत्र र नगद पुरस्कार बितरण गरेका थिए ।

चौतारा स्पोर्टिङ क्लवद्धारा आयोजनामा तीन दिन चलेको चौतारा साँगाचोकगढी माविस्तरीय प्रतियोगितामा नगरभित्रका १४ विद्यालयले प्रतिस्पर्धा गरेका थिए ।