क्षमता अभिबृद्धि तालिम सम्पन्न

चौतारा । चौतारा साँगाचोकगढी नगरपालिकाको सहयोगमा शब्दालय पब्लिकेशन एड मिडिया नेटवर्क प्रा.लि.को आयोजना गरेको पाँच दिने उद्घोषण, क्षमता अभिबृद्धि एवम् नेतृत्व विकास तालिम सम्पन्न भएको छ ।

चौताराको जुगल इनमा गरिएको तालिममा नगरपालिका भित्रका ४४ जना युवा, विद्यार्थीहरुको सहभागिता रहेको थियो । तालिममा उद्घोषणकला, दैनिक जीवनमा आईपर्ने जीवनोपयोगी सीप, नेतृत्व विकास लगायतको विषयमा प्रशिक्षार्थीहरुलाई सूचित गराईएको मूख्य प्रशिक्षक चिरञ्जिीवी कट्टेलले जानकारी दिए । तालिममा पवन कार्की, जगतमणी स्वती, रामशरण विक, गोपाल खड्कालगायत प्रशिक्षकहरुले सहजिकरण गरेका थिए ।

तालिम समापन समारोहमा चौतारा साँगाचोकगढी नगरपालिका– ५ का वडा अध्यक्ष शिव श्रेष्ठले सहभागिहरुलाई प्रमाणपत्र वितरण गर्दै सीकेको सीपलाई व्यवहारमा उतारी योग्य नागरिक बन्न जोड दिए । ‘तालिम लिएर मात्र हुँदैन, यो तालिमबाट सीकेका सीपहरुलाई व्यवहारमा उतार्दै समाज विकास अघि बढ्नु पर्छ’, उनले भने– ‘यो महत्वपूर्ण तालिम हो, त्यसैले आजैदेखि सीपलाई व्यवहारमा उतार्नुपर्दछ ।’

समारोहमा प्रशिक्षार्थीले सीकेको सीपलाई डेमोको रुपमा प्रस्तुत गरेका थिए । माघ २६ गतेबाट सुरु भएको तालिमको उद्घाटन चौतारा साँगाचोकगढी नगरपालिका– १३ का वडाअध्यक्ष रामप्रसाद गौतमले गरेको कार्यक्रम संयोजक सुवास गौतमले जानकारी दिए ।
प्रालिका अध्यक्ष सुन्दर शिरीषको अध्यक्षतामा भएको समापन समारोहमा अतिथिहरुलाई मायाको चिनो प्रदान गरिएको थियो भने प्रशिक्षार्थीहरुलाई प्रशिक्षण सामग्री प्रदान गरिएको थियो ।