कांग्रेस उपसभापति लामाले ज्यान मार्ने धम्की दिएको भन्दै लम्सालद्वारा पार्टी परित्याग

चौतारा । सिन्धुपाल्चोक नेपाली कांग्रेसका जिल्ला उपसभापति दोर्जे लामा ‘हाउडे’ ले ज्यान मार्ने धम्की दिएको भन्दै कांग्रेस क्षेत्रीय प्रतिधिनी शारदा लम्सालले पार्टी परित्याग गरेकी छिन् ।

शुक्रबार एक विज्ञप्ती जारी गर्दै उनले आफ्नै पार्टीको नेतृत्वले विना कारण ज्यान मार्ने धम्की दिने, सुन्न पनि नसकिने प्रकारका अश्लील अपशब्द बोल्ने गरेकोले पार्टी परित्याग गरेकी जनाएकी छिन् । उनले लामालाई कानूनी कारवाहिको लागि समेत अनुरोध गरेकी छिन् ।

‘पार्टीको उपल्लो पदमा रही आफ्नो पार्टीको सदस्यको परिवारलाई विना कारण ज्यान मार्ने धम्की दिने, सुन्न पनि नसकिने प्रकारका अश्लील अपशब्द बोल्ने अपराधिक मानसिकता भएको व्यक्तिको कारण हाम्रो सम्पूर्ण परिवार हाल मानसिक पीडामा रहेका छौं’, विज्ञप्तीमा भनिएको छ– ‘निज दोर्जे लामा भनिने ब्यक्ति उपर कडा भन्दा कडा कानूनी कारवाहिको लागि हामी सम्बन्धित निकायमा जाने छौं ।’

लम्सालले पार्टीले लामालाई अविलम्ब अनुसाशनको कारवाही गरी नेपाली कांग्रेसको साख जोगाउन समेत भनेकी छिन् ।

‘यस पार्टीको छविलाई समेत कलंकित बनाउने यस प्रकारको प्रवित्ति भएको व्यक्तिको कारण सिन्धुपाल्चोक जिल्ला, नेपाली कांग्रेस पार्टीलाई समेत भविश्यमा ठूलो क्षति हुने भएको कारण नीजको विगतका गतिविधिलाई समेत मध्यनजर गर्दै नीज उपर अविलम्ब अनुसाशनको कारवाही गरि समयमाने नेपाली कांग्रेसको साख जोगाई समाज परिवर्तको निमित्त अगाडि बड्न जोडदार माग गर्दै आजको मितीबाट म यस पार्टीको साधारण सदस्य समेत नरहने गरि पार्टी परित्याग गरेको जानकारी गर्दछु’, विज्ञप्तीमा भनिएको छ ।

हेर्नुस् विज्ञप्तीः