सिन्धु एमालेको अध्यक्षमा तीनजना भिड्दै

चौतारा । नेकपा एमाले सिन्धुपाल्चोकको १० औं जिल्ला अधिवेशनमा अध्यक्षमा दुई जना बीच कडा प्रतिष्पर्धा हुने भएको छ ।

वर्तमान अध्यक्ष कमल नेपाल र एमाले नेता होमनारयण श्रेष्ठबीच प्रतिस्पर्धा हुने भएको हो । यद्यपी अध्यक्ष पदमा भने तीन जनाले उम्मेदवारी दिएका छन् । नेपाल, श्रेष्ठसँगै बादल तामाङले उम्मेद्वारी दर्ता गराएको निर्वाचन समितिले जनाएको छ । तामाङले उम्मेदवारी दिए पनि प्रतिष्पर्धा भने नेपाल र श्रेष्ठबीचनै हुने एक एमाले नेताले बताए । ‘बादलको पक्षमा खासै मतदाता छैनन्, लहडमा उहाँले उम्मेदवारी दिनुभएको हो । प्रतिष्पर्धा कमल नेपाल र होमनारायण श्रेष्ठबीच नै हुने हो’, ती नेताले भने ।

त्यस्तै उपाध्यक्ष पदमा अर्जुन भण्डारी, बिष्णुमणी आचार्य र सुदनराज गिरीले उम्मेद्वारी दिएका छन् । सचिवमा कृष्णगोपाल तामाङ र यज्ञराज सापकोटाले उम्मेद्वारी दिएको निर्वाचन समितिले जनाएको छ । आइतबार बिहानबाट सुरु भएको बन्द सत्र पछि अध्यक्षमा सहमति नहुँदा उम्मेद्वारहरुले साँझ उम्मेदवारी दिएका हुन् ।

बन्द सत्रमा सांगठनिक, राजनीतिक, आर्थिक लगायत सिन्धुपाल्चोक समृद्धिको खाका पेश गरिएको र प्रतिवेदनहरु पास भएपछि नेतृत्व चयनको कार्य सुरु भएको एमालेले जनाएको छ । सोमबार बिहानबाट मतदान सुरु हुने बताईएको छ ।

अधिवेशनलाई शनिबार एमाले केन्द्रीय अनुशासन आयोगका पूर्व अध्यक्ष अमृतकुमार बोहराले उद्घाटन गरेका थिए । जिल्लाका १२ पालिका भित्रका १ सय ३ वडा, जनवर्गीय संगठन, मनोनीतसहित अधिवेशनमा ७ सय ४७ प्रतिनिधिहरु अधिवेशनमा सहभागी रहेको एमालेले जनाएको छ ।