तीजको शुभकामाना साट्दै महिलाहरुले गरे नाचगान

चौतारा । हिन्दू नेपाली महिलाको प्रमुख पर्व ‘हरितालिका तीज’को अवसर पारेर चौतारा साँगाचोकगढी नगरपालिका वडा नं. २ बतासेमा तीज विशेष शुभकामना आदान प्रदान कार्यक्रम गरिएको छ ।

जुगल आधारभूत विद्यालयको प्राङ्गणमा अखिल नेपाल महिला संघ र वडा महिला सञ्जालको संयुक्त आयोजनामा वडामा रहेका महिलाहरुलाई लक्षित गरी तीज विशेष कार्यक्रम गरेको हो । महिला नेतृ बालकुमारी सापकोटाको प्रमुख आथित्यतामा र वडा अध्यक्ष सुदीप श्रेष्ठ र रश्मी सिलवाल विशेष आथित्यतामा कार्यक्रम गरिएको थियो ।

सो अवसरमा बोल्दै महिला नेतृ बालकुमारी सापकोटाले तीज पर्व महिलाकोमात्र नभएर सबैको साझा पर्व बन्दै गएको बताइन् । यो पर्वले चेली र माइतीबीचको सम्बन्ध मजबुत बनाउने पर्व रहेको भनदै उनले आफ्नो संस्कृतिअनुसारको पर्वले एकआपसमा सम्बन्ध बलियो बनाउन मद्दत पुग्ने बताईन् ।

त्यस्तै वडा नं. २ का वडा अध्यक्ष सुदीप श्रेष्ठले तीज पर्वले महिलाहरुबीच एकता कायम गर्दै विकृति विसंगतिलाई चिर्नसक्नुपर्नेमा जोड दिए । ‘सामुहिक रुपमा वडाबासी एकै ठाउँमा पर्व मनाउदा बलियो सम्बन्ध स्थापित हुन्छ’, उनले भने– ‘सामाजिक सद्भाव, मेलमिलाप एवम् समाजका विविध विसङ्गति र सामाजिक अधिकारलाई उजागर गर्ने विभिन्न प्रकारका पर्वजस्तै तीजको पनि आफ्नै महत्व छ ।’ उनले पछिल्लो समय संस्कृतिको नाममा मनाइने तीज भड्किलो तरीकाले मनाउन थालिएकोप्रति चिन्ता व्यक्त गर्दै तडकभडक नगरिकन सभ्य भएर तीज मनाउनुपर्ने बताए ।

महिला सञ्जालकी अध्यक्ष गंगा पौडेलको अध्यक्षतामा भएको कार्यक्रममा महिलाहरुले नेपाली तीजका गीतहरुमा मनोरञ्जन लिँदै छमछमी नाँचेका थिए ।