मित्रता संघले गर्याे लेखा परीक्षण

चौतारा । चौतारा साँगाचोकगढी नगरपालिका– ९ जितपूरमा रहेको मित्रता संघले १४औं वार्षिक साधारण सभा तथा सामाजिक लेखा परीक्षण गरेको छ ।

आईतबार गोल्मादेवी माविको सभाकक्षमा भएको कार्यक्रममा मित्रता संघले गरेको विभिन्न गतिविधिको बारेमा जानकारी दिँदै संघका कार्यकारी निर्देशक विष्णु लामाले विशेष गरी शिक्षा क्षेत्रमा काम गरिरहेको बताए । ‘यस गृहले हालसम्म ३० जना बालबालिकालाई एसएलसी, एसईई परीक्षा पास गराउन सफल भएको छ भने ३५ जना बालबालिकालाई निःशुल्क शिक्षा प्रदान गरिरहेको छ’, उनले भने– ‘बालबालिकाहरुलाई शिक्षासँगै सीप, अतिरिक्त क्रियाकलापमा, भ्रमणजस्ता कार्यक्रममा समावेश गर्दै आएको छ ।’

उनले बालबालिकालाई शिक्षित, सवल, सक्षम, आत्मनिर्भर बनाउँदै गुणस्तरीय शिक्षाको विकास गर्नु संघको लक्ष्य रहेको बताउँदै बालमैत्री समाजको लागि शिक्षामार्फत आर्थिक विकासमा सम्मान सहभागिता सुनिश्चित गर्न संघ लागिरहेको बताए । संघले समुदायमा आधारित कार्यक्रम अन्र्तगत स्थानीयको आयआर्जनमा टेवा पुर्याउनने, स्वास्थ्यमा पहुँच पुर्याउन विभिन्न स्वास्थ्यका कार्यक्रम सञ्चालन गरेको लामाको भनाई थियो ।

कार्यक्रममा कार्यकारी निर्देशक लामाले आर्थिक वर्ष २०८०/०८१ को आयव्यव विवरण समेत प्रस्तुत गरेका थिए । आयव्यव विवरण अनुसार दातृ निकाय, स्थानीय सरकार र व्याजवापत ९५ लाख ३२ हजार ४ सय २२ रुपैंया आम्दानी गरेको संघले सो रकम बालगृहमा रहेका बालबालिकाको खाद्यान्न, औषधी उपचार, स्टेशनरी, लत्ताकपडा, शैक्षिक सामग्री, खेलकुद सामग्री, भवन मर्मत, तलबभत्ताजस्ता कार्यमा खर्च गरेको छ ।

चौतारा साँगाचोकगढी नगरपालिकाका दुर्गाप्रसाद ढुङ्लले सामाजिक लेखा परीक्षणको प्रतिवेदन प्रस्तुत गरेका थिए । चौतारा साँगाचोकगढी नगरपालिकाका प्रमुख, पूर्व प्रमुख अमानसिं तामाङ, वडा अध्यक्ष विमल श्रेष्ठ, समाजसेवी सिताराम गिरी, राजनीतिक व्यक्तित्व विदुर भारती, बादल तामाङ, प्रेस सेन्टर नेपाल सिन्धुपाल्चोकका अध्यक्ष सुन्दर शिरीष लगायतले साधारणसभाको सफलताको शुभकामना व्यक्त गरेका थिए ।

कार्यक्रमका बीच संघका पूर्व अध्यक्ष हरिचन्द्र भारतीलाई सम्मान समेत गरिएको थियो । संघको लेखापाल संगीता नेपालीले सञ्चालन गरेको कार्यक्रममा बालबालिकाले नृत्य प्रस्तुत गरी मनोरञ्जन प्रदान गरेका थिए । सो कार्यक्रम संघका अध्यक्ष मंगले तामाङको अध्यक्षतामा भएको थियो ।