लामोसाँघु–सिँगटी प्रसारण १३२ केभी प्रसारण लाइन निर्माण तीव्र

लामोसाँघु । जग्गा विवादका कारण लामो समयदेखि सुस्त रहँदै आएको लामोसाँघु–सिँगटी १३२ केभी प्रसारण लाइन निर्माणले गति लिएको छ । आयोजनाको आठओटा टावरको जग निर्माण भएसँगै कामले तीव्रता पाएको हो ।

सन् २०१२ को अन्त्यमै सम्पन्न हुनुपर्ने प्रसारण लाइन निर्माणमा विभिन्न ठाउँमा जग्गा विवादका कारण ढिलाइ भएको थियो । प्रसारण लाइनका लागि निर्माण गर्नुपर्ने १२५ ओटा टावरमध्ये ११७ टावरको निर्माण सम्पन्न भइसकेको तथा बाँकी आठओटा टावरको जग निर्माण गर्ने काम सकिएको लामोसाँघु–सिँगटी प्रसारण लाइन आयोजनाका आयोजना प्रमुख राजन ढुंगेलले जानकारी दिएका छन् । जग निर्माणको काम सकिएकाले अब टावरका लागि आवश्यक सामान निर्माणस्थलमा पुर्याउने काम भइरहेको उनले बताए ।

४० किलोमिटर डबल सर्किट तार तान्नुपर्नेमा निर्मित टावरहरूमा करिब ३१ किलोमिटर सिंगल सर्किट तार तान्ने काम समाप्त भएको आयोजनाले बताएको छ । ८ ओटा टावर निर्माण गर्ने, सिंगल सर्किट तार तान्ने तथा विद्युत् प्रसारण गर्न सिँगटी तथा लामोसाँघुमा रहेका सबस्टेशनमा उपकरण जडान गर्न अब डेढ महीना लाग्ने आयोजना प्रमुख ढुंगेलले जानकारी दिए । प्रसारण लाइन निर्माण समयमा सम्पन्न नहुँदा सिँगटी खोला र खानी खोला तथा खारे खोला बेसिनमा निजीक्षेत्रका निर्माण भएको जलविद्युत् आयोजनाहरूले विद्युत् उत्पादन शुरू गर्न सकेका छैनन् । १० मेगावाटको सिप्रिङ खोलाको विद्युत् खेर गइरहेको छ । यस्तै ११ मेगावाटको तल्लो खारे खोला, ५ मेगावाटको घट्टे खोला, २५ मेगावाटको सिँगटी खोला आयोजना पूरा गरी परीक्षणको चरणमा छन् ।

विद्युत् प्राधिकरणले लामोसाँघु–सिँगटी प्रसारण लाइन तथा सबस्टेशन निर्माणका लागि भारतीय ठेकेदार कम्पनी अरावली इन्फ्रा पावरसँग सन् २०१० अक्टोबरमा २ वर्षमा सक्नेगरी ठेक्का सम्झौता गरेको थियो । सम्झौताअनुसार २ वर्षभित्र प्रसारणलाइन र सिंगटीको सबस्टेसनसमेत निर्माण गर्नुपर्ने थियो । सबस्टेसन निर्माणका लागि साढे १७ करोड र प्रसारण लाइनका लागि करीब ४२ करोड रुपैयाँमा अरावलीले ठेक्का सम्झौता गरेको थियो । पहिलोपटक म्याद थप भएपछि ठेकेदार कम्पनी सम्पर्कविहीन भएपछि कम्पनीका स्थानीय प्रतिनिधिले अहिले प्रसारण लाइनको काम गरिरहेका छन् । कुनै असहज परिस्थिति उत्पन्न नभए डेढ महीनामा सिंगल सर्किटबाट विद्युत् प्रसार गर्ने अवस्थामा आयोजना पुग्ने आयोजना प्रमुख ढुंगेलले बताए ।