छिम्ती भीरमा रक क्लाइम्बिङ सुुरु

भाेताङ । पाँचपोखरी थाङ्गपपाल गाँउपालिका– ३ को छिम्ती भीरमा रक क्लाइम्बिङ सुरु गरिएको छ ।

पर्यटन प्रबद्धनका लागी रक क्लाइम्बिङ सुरु गरेको वडा अध्यक्ष ङिमा छिरिङ तामाङले बताए । नेपाल सरकारले सार्वजनिक गरेको नेपालका घुम्न लायक ठाँउमध्ये पर्ने पाँचपोखरी जाने बाटोमा पर्ने छिम्ती भिरमा रक क्लाइम्बिङ, कृत्रिम झरना र भियाब्रता लगायतका योजना एकै ठाँउमा भएको यो एसियाकै पहीलो स्थान रहेको वडा अध्यक्ष तामाङले बताए ।

राजधानीदेखी नजीक रहेको पाँचपोखरी पदमार्गमा पर्ने सो स्थानमा यी योजनाहरुअघि सारिएको हो । जुगल रेन्जका हिमाल र गाङ्गछोङम्बा हिमालको दृष्यावलोकन गर्न सकिने सो स्थानमा तीनवटै योजनाहरुको सुरुवात भईसकेपश्चात स्थानीय युवाहरुलाई रोजगारी पाउनुका साथै वडा र गाँउपालिकाले आम्दानी गर्न सक्ने वडा अध्यक्ष तामाङले बताए ।

कृत्रिम झरनालाई बहुउद्देश्यीय हुने गरी निर्माण हुन लागेको छ । छिम्ती भीरभन्दा पल्लो भेगमा रहेको देउराली र डुखाङ लगायतका बस्तीमा सिंचाई हुने र झरनाको दृष्यावलोकन गर्न सकिने छ । रक क्लाइम्बिङको पनि परीक्षण सुरु भइसकेको छ । भियाब्रताको भने डिपिआर तयार भईसकेको र छिटै काम अगाडी बढाउने योजना रहेको गाँउपलिकाले जनाएको छ ।

रक क्लाइम्बिङको पहिलो दिन स्थानीयहरुले चट्टान चढ्दै सुरुवात गरेका थिए । रक क्लाइम्बिङ गर्ने पहिलो महिला कमला तामाङले आफ्नै ठाँउमा सुरु भएको यो कामले आन्तरिकक तथा बाह्य पर्यटकका लागि नयाँ अनुभव हुने बताईन् ।