चौताराले शिक्षक समायोजनमा मनोमानी गरेको भन्दै जनप्रतिनिधि असन्तुष्ट

चौतारा । चौतारा साँगाच‍ोकगढी नगरपालिकाले गरेको शिक्षक समायोजनमा नगरकै वडाध्यक्षहरुले असहमति जनाएका छन् ।

नगरपालिकामा निःशुल्क शिक्षा कार्यान्वयनका लागि शिक्षक–विद्यार्थी अनुपातमा शिक्षक समायोजन गरि ३८ जना शिक्षकलाई बैशाख ४ गते सरुवा गरेको छ । सो सरुवामा राम्रोलाई भन्दा हाम्रोलाई समायोजन, कार्यपालिका बैठकका सहमति प्रतिको तुषारापात, वडा शिक्षा समितिलाई समेत बेवास्ता गरि समायोजन गरेको भन्दै वडा नं १४ का वडाध्यक्ष उद्वव नेपालले समाजिक सञ्जाल फेसबुकमा लेखेका छन् ।

उनले विभेदकारी समायोजन गरेकोप्रति कटाक्ष गर्दै नगर प्रमुख, प्रमुख प्रशासकीय अधिकृत, युवा खेलकुद तथा शिक्षा शाखा, नगर शिक्षा समिती र सामाजिक विकास समितिलाई विशेष धन्यवाद भनेका छन् ।

त्यस्तै वडा नं. ५ का वडाध्यक्ष शिव श्रेष्ठले समेत सहमति कार्यान्वयन नभएको भनी आक्रोश पोखेका छन् । ‘धन्यवाद कसलाई दिउ नगर प्रमुख, प्रमुख प्रशासकीय अधिकृत, नगर शिक्षा समिति वा सामाजिक बिकास समितिलाई वडा शिक्षा समितिको सल्लाह, सुझाव र अनुरोधलाई लात हान्ने प्रयास गर्दै मनलागी तन्त्र गरेकोमा’, उनले फेसबुकमा लेखेका छन् ।

त्यस्तै वडा नं ९ का वडाध्यक्ष विमल श्रेष्ठले नगर शिक्षा युवा तथा खेलकुद शाखा मार्फत वडा शिक्षा समितिलाई बाइपास गरेरसहमति विपरीत, नगर शिक्षा ऐन २०७६ को भावना विपरित दरबन्दी मिलान गरेको भन्दै असन्तुष्टि व्यक्त गरेका छन् ।

त्यसो त नगरपालिकामा शिक्षक तथा कर्मचारी नियुक्ति गर्दा माओवादी पार्टीका कार्यकर्ता मात्रै छनौट गर्ने गरेको आरोप नगर प्रमुख कृष्णप्रसाद सापकोटामाथि छ । नगरपालिकाले गर्ने गरेक गतिविधिहरुमा राजनीतिककरण हुने गरेको भन्दै नगरबासीले रोष प्रकट गर्दै आईरहेका छन् ।

यो पनि हेर्नुहोस्ः

चौतारा नगरमा शिक्षक हुन माओवादी मात्रै योग्य !