नगरस्तरीय राष्ट्रपति रनिङ शील्ड सुरु

चौतारा । तेस्रो नगरस्तरीय राष्ट्रपति रनिङ शील्ड प्रतियोगिता सुरु भएको छ । चौतारा साँगाचोकगढी नगरपालिका– ४ स्थित कालिकादेवी माविमा नगरप्रमुख अमानसिं तामाङको प्रमुख आतिथ्यतामा प्रतियोगिता सुरु गरिएको हो ।

नगर खेलकुद विकास समितिको आयोजनामा चैत्र १२ गतेबाट सुरु भई चैत्र १४ गते समापन हुनेछ । नगरभरका ११ वटा विद्यालयहरुको सहभागिता रहेको प्रतियोगितामा ५ सय खेलाडीहरुको सहभागिता रहने छ । भलिवल (महिला र पुरुष छुट्टाछुट्टै), कबड्डी, एथलेटिक्स, मार्शल आर्ट लगाएतका विधाका खेलहरु हुनेछन् ।

हरेक विधामा प्रथम हुनेलाई १५ हजार रुपैंया, द्वितीय हुनेलाई १२ हजार रुपैंया र तृतीय हुनेलाई ९ हजार रुपैंया पुरस्कार प्रदान गरिने आयोजकले जनाएको छ । यस प्रतियोगितामा छनोट भएका खेलाडीहरुलाई २०७८ वैशाख ११ र १२ मा मेलम्चीमा हुने जिल्लास्तरिय राष्ट्रपति रनिङ शील्ड प्रतियोगितामा सहभागी गराइने छ ।