कविताः भोट माग्न जाउँ

आउ तिमी र म भोट माग्न जाउ
भोटसंगै थरिथरिका नोट माग्न जाउ
तिमी भन्नू मेरो बाईकमा ट्याङ्की रित्तै छ
म भनुम्ला हाम्रो पार्टीमा पेट्रोल सित्तै छ
आउ तिमी र म भोट माग्न जाउ
भोटसंगै थरिरिका नोट माग्न जाउँ

अचेल होटलहोटलमा जमात चर्काे छ
कस्ले बाजी मार्ला भन्ने तनाव अर्को छ
यति होडबाजी नेपालको विकासमा छैन
जति गाउँमा मगन्ते भोटको लर्को छ
आउ तिमी र म भोट माग्न जाउँ
भोटसंगै थरिरिका नोट माग्न जाउ

यहाँ दिनकादिन झ्याल फुटे, मान्छे कुटे
कतै बेन्च फुटे कतै टेबुल फुटे, टिकट लुटे
भोटको नाउमा सरकारले सधैं जनता लुटे
आज पालो जनताको भोटका लागि नेता लुटे
आउ तिमी र म भोट माग्न जाउँ
भोटसंगै थरिरिका नोट माग्न जाउँ

पदको लालचमा अन्धाहरुले नीति बिर्सिए
व्यवस्था बदल्न हिँडेकाले स्थिति बिर्सिए
जनताले आफू बारबार छक्याएको बिर्सिए
पार्टी प्रतिको कर्तव्य अस्था सबै बिर्सिए
आउ तिमी र म भोट माग्न जाउँ
भोटसंगै थरिरिका नोट माग्न जाउँ

पल्लाघरे माईला बा नी काँग्रेस मा उठेछन्
उनकै छोरा जेठो पनि एमालेमा उठेछन्
बा कै छोरा कान्छो माओवादी मा उठेछन्
उठ्दा उठ्दै थाकेका माईला दाई राप्रपामा उठेछन्
आउ तिमी र म भोट माग्न जाउँ
भोटसंगै थरिरिका नोट माग्न जाउँ

विकासका नाउँमा बिनासिको बुद्धि कहिले आएन
जनताको घैटाभित्र पनि घाम कहिले लागेन
बारम्बार अवसरवादी चुनिरहन्छन्
तिनैलाई बधाईको माला उनिरहन्छन्
आउ तिमी र म भोट माग्न जाउँ
भोटसंगै थरिथरिका नोट माग्न जाउँ
०००